Blaðamaður hljóp undir bagga með Sigmundi Davíð og gaf öryrkja barnabók

Helen Sjöfn Steinarsdóttir, öryrkinn sem sendi forsætisráðherra beiðni um fjárhagslega aðstoð eða lán fyrir skemmtilegri barnabók til að gefa barnabarni sínu í jólagjöf, hefur fengið ósk sína uppfyllta. Ómar Valdimarsson blaðamaður greinir frá því að hann hafi sótt Helen heim með nýútkomna bók sína og gefið henni.

Í pistli sínum í Fréttablaðinu í dag sótti Helen aðeins að forsætisráðherra og segist bíða spennt „eftir þeirri örsnöggu lífskjarabót sem þú hefur boðað okkur um áramótin.“

„En, nú eru að koma jól og ég verð að viðurkenna að mig dreymir um að geta gert mér smá dagamun og líka glatt mína nánustu. Ég á eitt barnabarn sem mig langar að gefa jólagjöf og þar sem ég er ekki einu sinni með tíu þumalfingur heldur tuttugu tær eru föndur og/eða handavinna út úr myndinni. Barnið er mikill bókaormur og langar mig óskaplega að geta keypt handa því einhverja af þeim skemmtilegu barnabókum sem voru að koma út,“ sagði Helen sem segist ekki geta hugsað sér að leita til fjölskyldu sinnar eina ferðina enn. Hún hafi styrkt hana eftir bestu getu til þessa en nú sé nóg komið.

Hljóp undir bagga með Sigmundi Davíð

„Því datt mér í hug, kæri Sigmundur Davíð, að þú prívat og persónulega, værir kannski til í að styrkja mig um smáupphæð fyrir jólin (held að nýútkomin barnabók gæti kostað 3-4 þús. kr.)? Ég frétti nefnilega á skotspónum að þú hefðir fengið sanngjarna launahækkun, meira að segja nokkra mánuði aftur í tímann, og ert því kannski aflögufær!“

Ekki liggur fyrir hvort beiðni Helen úr pistlinum hafi ratað á borð forsætisráðherra en þó er greinilegt að beiðnin hefur vakið athygli. Þeirra á meðal er fyrrnefndur Ómar sem segist hafa komið við „heima hjá hinni ljúfu Helen í dag og færði henni nýútkomna barnabók sína, 13 skrýtnir jólasveinar, sem hann skrifaði með mömmu sinni.

„Þar sem ráðherrann á sjálfsagt annríkt þessa dagana við að ljúka við aðra umræðu um fjárlagafrumvarpið ákvað ég að hlaupa undir bagga með honum,“ segir Ómar. Hann segist vonast til þess að framtak sitt liðki til við fjárlagaumræðuna og geri stjórnmálamönnum fært að bæta kjör allra.

Helen Sjöfn Steinarsdóttir skrifaði greinarstúf í Fréttablaðið í morgun og óskaði þar eftir því að Sigmundur Davíð...

Posted by Ómar R. Valdimarsson on Tuesday, December 15, 2015