Downton Abbey-stjarna missti unnusta sinn úr sjaldgæfu krabbameini

Ein aðalstjarna sjónvarpsþáttanna Downton Abbey, Michelle Dockery missti unnusta sinn, John Dineen, úr sjaldgæfu krabbameini síðastliðinn sunnudag en Dineen var jafngamall Dockery, aðeins 34 ára.  

Dineen, sem var frá Írlandi, greindist snemma á þessu ári með krabbameinið en Dockery, sem var í Bandaríkjunum í seinustu viku að kynna seinustu þáttaröðina af Downton Abbey, flaug þangað til að vera með unnustanum og fjölskyldu hans á kveðjustund.

Í tilkynningu sem leikkonan hefur sent frá sér þakkar hún fyrir stuðning og hlýhug en óskar fyrir hönd fjölskyldunnar eftir því að fá að syrgja í ró og næði.

Aðdáendur Downton Abbey muna eflaust eftir því að persóna Dockery í þáttunum, lafði Mary, missti eiginmann sinn, Matthew Crawley, í bílslysi í lok 3. þáttaraðar.