Ferguson spilar með Skotum í dag

George Burley gat andað aðeins léttar eftir að í ljós kom að Barry Ferguson, landsliðsfyrirliði, verður með Skotum gegn Hollendingum í dag.

Þetta verður fyrsti leikur Ferguson með skoska landsliðinu í undankeppni HM en hann hefur misst af þremur leikjum til þessa - gegn Makedóníu, Íslandi og Noregi.

„Það er gríðarlega mikilvægt að fá Barry aftur á miðjuna í hans fyrsta leik í undankeppni HM," sagði Burley landsliðsþjálfari. „Ég er gríðarlega ánægður með að hann skuli vera klár í slaginn. Mér finnst að hann, Scott Brown og Darren Fletcher geti staðist hverjum sem er snúning."

Mikið hefur verið um meiðsli í herbúðum Skota og er fjöldi leikmanna fjarverandi. Skotar mæta Íslendingum í undankeppni HM 2010 á miðvikudagskvöldið.