Stefnir ríkinu vegna auðlegðarskatts

Karlmaður hefur höfðað mál gegn íslenska ríkinu vegna auðlegðarskatts sem á hann var lagður. Hann fullyrðir að innheimta skattsins sé ólögleg og krefst þess að ríkissjóður greiði sér um 1590 þúsund krónur til baka.

Auðlegðarskatturinn er nú 1,5% af eignum einstaklinga umfram 75 milljónir króna en tvö prósent ef eignirnar ná yfir 150 milljónir. Þá er hann 1,5% hjá hjonum sem eiga eignir yfir 100 milljónir króna en 2% nái eignirnar yfir 200 milljónir.

Það er Ásgeir Þór Árnason hæstaréttarlögmaður sem rekur málið fyrir Héraðsdómi Reykjavíkur fyrir hönd mannsins. Umbjóðandi hans byggir á því í stefnu sinni að auðlegðarskatturinn brjóti í bága við eignarréttarákvæði stjórnarskrárinnar og mannréttindasáttmála Evrópu. Í stefnunni segir að skatta megi leggja á borgarana til þess að standa straum af þeim kostnaði, sem leiði af opinberum rekstri. Skattálagning sú, sem þetta mál sé höfðað út af, gangi hins vegar langt út fyrir þær skorður, sem ákvæði stjórnarskrárinnar setji löggjafanum.

Greint var frá því í kvöldfréttum Stöðvar 2 í gær að Garðar Valdimarsson hæstaréttarlögmaður segir auðlegðarskattinn ganga gegn stjórnarskrá, einkum ákvæðum um eignarrétt. Hann telur Hæstarétt hafa gefið leiðsögn í þessum efnum í dómsmáli árið 1958, þar sem deilt var um stóreignaskattinn svonefnda.

Málið sem er rekið fyrir dómstólum var þingfest fyrir Héraðsdómi Reykjavíkur í sumar. Síðasta fyrirtaka fór fram í gær, en aðalmeðferð er fyrirhuguð í maí. Fréttastofa hefur engar skýringar fengið á því hvers vegna málareksturinn tekur svo langan tíma.