„Við erum að tryggja að enginn fari sér að voða“

„Það hefur bara nú í morgun fyrst verið að koma í ljós hvernig ástandið er á svæðinu og við erum bara að fara yfir það,“ segir Svavar Pálsson, sýslumaður á Húsavík. Vegum var lokað á hálendi Norðausturlands í nótt í kjölfar þess að gos hófst í Holuhrauni og segir Svavar að þær lokanir verði áfram í gildi með sérstökum undantekningum fyrir fjölmiðla- og vísindamenn.

„Við erum að vinna úr þessum atburði sem stendur yfir, sem er ekki lokið, og þá ber okkur að tryggja það að enginn fari sér að voða,“ segir Svavar. „Það er í raun það sem við erum að gera.“

Viðbúnaðarstigi almannavarna var í nótt breytt úr hættustigi í neyðarstig. Svavar útskýrir að hættustig á einungis við þegar atburður er yfirvofandi en neyðarstig þegar atburður er hafinn. Hann segir embætti sitt bíða eftir frekari upplýsingum áður en frekari viðbúnaði verði komið á.

„Þetta er náttúrulega bara í stöðugri endurskoðun eftir því sem upplýsingar koma frá vísindamönnum um eðli atburðarins,“ segir hann. „Við högum okkar undirbúningi í samræmi við það. Gosið stendur yfir og við erum bara í því að tryggja öryggi.“