Sport

Íslandsmeistarar dagsins: Ekkert aprílgabb hjá þessum tveimur liðum

Óskar Ófeigur Jónsson skrifar
Haukakonur með Íslandsmeistaratitilinn sem þær unnu 1. apríl 2009.
Haukakonur með Íslandsmeistaratitilinn sem þær unnu 1. apríl 2009. Mynd/KKÍ

Þessa dagana eru úrslitin vanalega að ráðast í úrslitakeppnum Domino´s og Olís deildanna í körfubolta og handbolta. Kórónuveiran hefur komið í veg fyrir það gerist í ár en Vísir ætlar í staðinn að rifja upp Íslandsmeistara dagsins næstu vikurnar.

Frá því að úrslitakeppnirnar voru fyrst teknar upp í deildunum fjórum, Olís karla og kvenna og Domino´s karla og kvenna, hafa tvö lið orðið Íslandsmeistarar 1. apríl.

Íslandsmeistarar dagsins eru kvennalið ÍBV í handbolta sem vann fjórða Íslandsmeistaratitil kvennaliðs félagsins 1. apríl 2006 og kvennalið Hauka í körfubolta sem vann þriðja Íslandsmeistaratitil kvennaliðs félagsins 1. apríl 2009.

Bæði þessi lið höfðu unnið marga titla á árunum á undan en þau höfðu jafnframt gengið í gegnum miklar breytingar síðan þá. Það höfðu því ekki allir eins mikla trú á því að þessi lið gætu fylgt eftir frábærum árangri vel mannaðra liða sinna árin á undan nú þegar margar af hetjunum höfðu yfirgefið skipið.

Frétt um Íslandsmeistaratitil ÍBV í DV.Skjámynd/DV

Síðasta dollan sem ég ætla að lyfta

Eyjakonur urðu fyrst Íslandsmeistarar árið 2000 og svo aftur tvö ár í röð, 2003 til 2004, þegar liðið var skipað mörgum frábærum erlendu atvinnumönnum. Veturinn 2005-06 var ekki lengur úrslitakeppni en Eyjakonur höfðu betur eftir æsispennandi keppni við Val og Hauka sem enduðu bæði aðeins stigi á eftir.

ÍBV liðið tryggði sér titilinn með með því að vinna fjögurra marka sigur á HK, 31-27, í Digranesi í lokaumferðinni.

Ingibjörg Jónsdóttir, fyrirliði ÍBV-liðsins, var þarna Íslandsmeistari með Eyjaliðinu í þriðja sinn á sjö árum og tilkynnti það eftir leikinn að hún væri hætt. Hún stóð reyndar ekki alveg við það.

„Þetta er mjög sætt. Þetta er síðasta dollan sem ég ætla að lyfta sem leikmaður. Tímabilið var svona upp og ofan og margir voru búnir að afskrifa okkur um jólin. En við komum sterkar til baka og tókum þetta á seiglunni,“ sagði Ingibjörg Jónsdóttir sem skoraði sex mörk í leiknum.

Einn leikmaður ÍBV liðsins í dag tók þátt í þessum Íslandsmeistaratitli fyrir fjórtán árum en að var Ester Óskarsdóttir sem var þarna ekki búin að halda upp á átján ára afmælið sitt.

Eyjaliðið gekk í gegnum ýmislegt á þessu tímabili og tapaði meðal annars með átta mark mun á móti Haukum í janúar, 36-28. ÍBV-liðið vann alla sjö leiki sína eftir það og tryggði sér titilinn síðan í lokaumferðinni.

„Þetta er toppurinn á mínum ferli og er ástæðan fyrir því að ég til Eyja upphaflega. Þetta lið þjappaði sér saman á hárréttum tíma á ótrúlegan hátt og stelpurnar eiga hrós skilið. Þær voru að gefa einfalda en árangursríka hluti á þessu tímabili með frábærum varnarleik og stórkostlegri markvörslu. Það skilaði þessum bikar sem við eigum í dag,“ sagði Alfreð Örn Finnsson, þjálfari ÍBV við Fréttablaðið.

ÍBV Íslandsmeistari 2006

  • DHL-deild kvenna í handbolta
  • Dagssetning: 1. apríl
  • Staður: Digranes í Kópvogi
  • Þjálfari: Alfreð Örn Finnsson
  • Fyrirliði: Ingibjörg Jónsdóttir
  • Árangur:15 sigrar og 2 töp í 18 leikjum
  • 86 prósent stiga í húsi (31 af 36)

Atkvæðamestar í deildarkeppninni:

  • Pavla Plaminkova 126 mörk
  • Simona Vintila 102 mörk
  • Ingibjörg Jónsdóttir 71 mark
  • Renata Kári Horvath 65 mörk
  • Ragna Karen Sigurðardóttir 46 mörk
  • Ester Óskarsdóttir 29 mörk
  • Eva Björk Hlöðversdóttir 12 mörk
Uppslátturinn um sigur Haukakvenna í Morgunblaðinu 2009.Skjámynd/Morgunblaðið



Þetta eru bara töffarar

Körfuboltalið Hauka hafði einnig gengið í gegnum miklar breytingar þegar liðið vann Íslandsmeistaratitilinn vorið 2009 eftir oddaleik á móti KR á Ásvöllum.

Haukarkonur höfðu unnið tvo Íslandsmeistaratitla í röð 2006 og 2007 en eftir seinni titilinn fór Helena Sverrisdóttir út í skóla í Bandaríkjunum, Pálína Gunnlaugsdóttir fór í Keflavík, Sigrún og Guðrún Ósk Ámundadætur fóru í KR og Unnur Tara Jónsdóttir fór til Finnlands. Eftir stóðu stelpur sem höfðu verið í titlum hlutverkum í meistaraliðinu en fengu nú liðið í fangið.

„Í þessu liði eru bara fjórar úr meistaraliðinu 2007. Þetta er auðvitað ótrúlegt. Sérstaklega með hliðsjón af því að við erum með svo ungt lið. En við fáum frábæran persónuleika í Slavicu Slavica Dimovsku og erum með Kristrúnu Sigurjónsdóttur sem er frábær leiðtogi. Dimovska hefur verið meidd síðan við spiluðum við KR í síðustu umferð deildarkeppninnar og Kristrún hefur verið meidd alla úrslitakeppnina. Þetta eru bara töffarar,“ sagði Yngvi Páll Gunnlaugsson, þjálfari Hauka í viðtali við Morgunblaðið eftir leik.

Haukar unnu KR 69-64 í hreinum úrslitaleik um Íslandsmeistaratitilinn sem fór fram á Ásvöllum, heimavelli Hauka. Haukarnir voru deildarmeistarar og nutu þess í lokaleiknum.

Lykilatriði var að semja við hina makedónísku Slavica Dimovska sem var frábær með Haukaliðinu þennan vetur. Hún lék með Fjölni veturinn á undan og vann þá bara einn leik í deildarkeppninni. Haukarnir veðjuðu á hana og sáu ekki eftir því. „Ég er rosalega ánægð og hamingjusöm. Þetta er fyrsti alvöru titilinn minn í meistaraflokki og ég er himinlifandi með þetta allt saman,“ sagði Slavica Dimovska við Morgunblaðið eftir leikinn.

Slavica Dimovska var með 27 stig og 4 stoðsendingar í lokaleiknum en þá skoraði bandaríski bakvörðurinn Monika Knight 15 stig og gaf 8 stoðsendingar að auki og fyrirliðinn Kristrún Sigurjónsdóttir var með 11 stig. Þá má ekki gleyma Rögnu Margréti Brynjarsdóttur sem var með 9 fráköst og 6 varin skot.

Haukar Íslandsmeistari 2009

  • 1. deild kvenna í körfubolta
  • Dagssetning: 1.apríl
  • Staður: Ásvellir í Hafnarfirði
  • Þjálfari: Yngvi Páll Gunnlaugsson
  • Fyrirliði: Kristrún Sigurjónsdóttir
  • Árangur: 17 sigrar og 3 töp í 20 deildarleikjum
  • 6 sigrar og 3 töp í 9 leikjum í úrslitakeppni
  • 79 prósent sigurhlutfall (23-6)

Atkvæðamestar í lokaúrslitunum:

  • Slavica Dimovska 98 stig (19,6 í leik)
  • Moneka Knight 71 stig (14,2)
  • Kristrún Sigurjónsdóttir 48 stig (9,6)
  • Ragna Margrét Brynjarsdóttir 42 stig (8,4)
  • Telma Björk Fjalarsdóttir 25 stig (5,0)
  • Guðbjörg Sverrisdóttir 21 stig (4,2)

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.