Borche Ilievski hefur skrifað undir nýjan samning um að þjálfa meistarflokk karla í körfubolta hjá ÍR næstu þrjú árin, eða til ársins 2023.
Borche tók við sem aðalþjálfari ÍR í nóvember árið 2015 eftir að hafa verið aðstoðarmaður Bjarna Magnússonar. Borche mun því hafa stýrt liðinu í átta leiktíðir þegar nýi samningurinn rennur út. Undir hans stjórn hefur ÍR komist í úrslitakeppni Domino‘s-deildarinnar síðustu fjögur ár og liðið komst í úrslitaeinvígið í fyrra þar sem það tapaði í oddaleik gegn KR.
Í dag framlengdi Borche Ilievski þjálfari meistarflokks karla veru sína hér í Breiðholti til þriggja ára.
— IR Korfubolti (@irkarfa) March 31, 2020
Borche tók við sem aðalþjálfari liðsins 2015 og hefur náð að tryggja liðið í úrslitakeppni síðustu 4 ár.
ÍR hlakkar til að mæta sterkari til leiks pic.twitter.com/YQJR09Huy3
ÍR var í sjöunda sæti og öruggt um sæti í úrslitakeppninni þegar tímabilið var flautað af fyrr í þessum mánuði, vegna kórónuveirufaraldursins.
Borche er 47 ára gamall Makedóníumaður sem hefur starfað á Íslandi nær sleitulaust frá árinu 2006. Hann þjálfaði lið KFÍ frá 2006 til 2010, Tindastól 2011-2012 og Breiðablik árin 2012-2015.
