Ís­lendingarnir í OB ekki með kórónu­veiruna

Mads Frøkjær, samherji Sveins og Arons, greindist með kórónuveiruna í gærmorgun en allir leikmenn voru sendir í sóttkví á mánudaginn eftir að grunur kom upp um smit.

Allir leikmenn liðsins fóru í prófanir á mánudaginn og voru allir neikvæðir, ef undan er skilinn Mads. Þeir voru svo aftur prófaðir í gær og þar var enginn jákvæður.

Aron og Sveinn eru því í leikmannahópi OB sem mætir C-deildarliðinu Nykøbing FC í danska bikarnum á útivelli í 16-liða úrslitum bikarsins í kvöld.

„Við viljum gjarnan komast langt í bikarnum og það mun sýna sig í byrjunarliðinu,“ sagði Jacob Michaelsen, þjálfari OB, í samtali við fyens.dk.

Sveinn skoraði sitt fyrsta mark fyrir Odense um síðustu helgi er liðið hafði betur gegn Álaborg, 2-1, á heimavelli. Sveinn skoraði fyrra mark liðsins.