Sport

Fyrsti þrífrestaði leikur NFL deildarinnar á loksins að fara fram í kvöld

Óskar Ófeigur Jónsson skrifar
JuJu Smith-Schuster og félagar í Pittsburgh Steelers spila loksins í kvöld sex dögum seinna en þeir áttu upphaflega að spila við Baltimore Ravens.
JuJu Smith-Schuster og félagar í Pittsburgh Steelers spila loksins í kvöld sex dögum seinna en þeir áttu upphaflega að spila við Baltimore Ravens. Getty/ David Rosenblum

Útsending frá leik Pittsburgh Steelers og Baltimore Ravens á Stöð 2 Sport 4 í kvöld mun vera með aðeins öðrum hætti en vanalega. Sjónvarpshléin endalausu verða klippt út í kvöld.

Það hefur gengið illa að koma á leik Pittsburgh Steelers og Baltimore Ravens í NFL-deildinni en fjórða tilraunin verður í kvöld og leikurinn verður sýndur á Stöð 2 Sport.

Pittsburgh Steelers hefur unnið alla tíu leiki sína á tímabilinu og er eina taplausa lið NFL deildarinnar. Þetta er besta byrjun Steelers í sögunni en þeir hafa þurft að bíða lengi eftir ellefta leiknum sínum.

Baltimore Ravens hefur aftur á móti verið allt annað en sannfærandi á þessu tímabili þrátt fyrir miklar væntingar fyrir leiktíðina. Nú síðast hefur liðið verið að berjast við mikið hópsmit innan leikmannahópsins.

Kórónuveirusmitin hjá bæði leikmönnum og starfsfólki hafa séð til þess að loka þurfti æfingasvæði Baltimore Ravens í marga daga. NFL er nánast tilbúið að gera hvað sem er til að aflýsa ekki leiknum.

Af þeim sökum hefur NFL-deildin þurft að fresta þessum leik þrisvar en hann átti upphaflega að fara fram að kvöldi Þakkargjörðardagsins.

Baltimore Ravens hefur tapað tveimur leikjum í röð en er með samtals sex sigra í tíu leikjum. Liðið þarf nauðsynlega á fleiri sigrum ætli liðið sér inn í úrslitakeppnina.

Það er ekki algengt að NFL-leikur fari fram á miðvikudegi og hvað þá klukkan 15.40 að staðartíma en það er verið að kveikja á jólatrénu hjá Rockefeller Center í 88. sinn í kvöld og NBC sjónvarpsstöðin er að sýna báða viðburði.

Útsendingin á Stöð 2 Sport verður því með aðeins öðruvísi hætti að þessu sinni. Hún mun hefjast klukkan 22.00 að íslenskum tíma á Stöð 2 Sport 4 eða 80 mínútum eftir að leikurinn byrjar. Það verður því hægt að horfa á Meistaradeildina og skipta síðan yfir á NFL.

Með þessu verður hægt að klippa út öll sjónvarpshléin sem eru í NFL leikjunum og horfa þess í stað á leikinn samfellt án þessara miklu hléa. Þeir sem vilja sjá leikinn í þráðbeinni geta hins vegar horft á hann í gegn Game Pass en sú útsending hefst klukkan 20.40.


NFL er á Stöð 2 Sport en upplýsingar um útsendingar má finna hér. NFL er hluti af Stöð 2 Sport erlent sem kostar 3.990 krónur á mánuði. Beinar útsendingar frá öllum leikjum eru á NFL Game Pass sem hægt er að kaupa sem viðbót við Sportpakkann á 2.000 krónur á mánuði.

NFL



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.