KR staðfestir komu Grétars Snæs

Knattspyrnumaðurinn Grétar Snær Gunnarsson er genginn til liðs við KR en hann lék með Fjölni í Pepsi-Max deildinni á nýafstaðinni leiktíð.

Á heimasíðu KR segir frá því að Grétar geri þriggja ára samning við Vesturbæjarstórveldið.

Grétar Snær er 23 ára gamall og er fjölhæfur leikmaður. Þrátt fyrir ungan aldur hefur hann farið víða á ferli sínum en eftir að hafa alist upp hjá Haukum hefur hann leikið fyrir FH, Víking Ólafsvík, HK og Fjölni í meistaraflokki hér á landi auk þess að hafa spilað eitt tímabil með HB í færeysku úrvalsdeildinni.

KR-ingar voru í 5.sæti Pepsi-Max deildarinnar þegar keppni var hætt vegna kórónuveirufaraldursins.