Verkfallsaðgerðum starfsmanna álversins í Straumsvík frestað

Sunna Kristín Hilmarsdóttir skrifar 22. október 2020 08:34

Reinhold Richter, aðaltrúnaðarmaður starfsmanna álversins í Straumsvík. Vísir/Egill

Verkfallsaðgerðum starfsmanna álversins í Straumsvík sem hefjast áttu á morgun hefur verið frestað. Þetta segir Reinhold Richter, aðaltrúnaðarmaður starfsmanna álversins, í samtali við Vísi.

Samninganefndir starfsmanna og ISAL sátu á samningafundi í húsakynnum ríkissáttasemjara til ríflega tvö í nótt.

Að sögn Reinholds var gert samkomulag við ISAL sem er bindandi af þeirra hálfu. Samkomulagið sé grundvöllur að kjarasamningi.

„Sem við viljum kannski útvíkka en við höfum grunn sem við getum byggt algjörlega á og vitum að starfsmenn verða ekki óánægðir með,“ segir Reinhold.

Hann var á leið í álverið þegar Vísir náði tali af honum til að kynna samkomulagið fyrir starfsmönnum. Hann vill ekki fara út í hvað í því felst.

Næsti fundur í deilunni hefur verið boðaður á fimmtudaginn í næstu viku. Í millitíðinni munu báðir aðilar fara í ákveðna vinnu hvor í sínu lagi með tilliti til samkomulagsins sem gert var í nótt.

Kjaramál Vinnumarkaður Hafnarfjörður Stóriðja

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.