Íslenski boltinn

Langflest félög vildu klára mótið en miklar áhyggjur vegna æfingabanns

Sindri Sverrisson skrifar
KR á mikið undir því að Íslandsmótið verði klárað svo liðið geti freistað þess að ná Evrópusæti. Stjarnan er örugg um Evrópusæti ef ekki verður spilað meira.
KR á mikið undir því að Íslandsmótið verði klárað svo liðið geti freistað þess að ná Evrópusæti. Stjarnan er örugg um Evrópusæti ef ekki verður spilað meira. VÍSIR/HULDA MARGRÉT

Langflest knattspyrnufélaganna í efstu deildum karla voru sammála ákvörðun stjórnar KSÍ um að freista þess að klára Íslandsmótið 2020 innan vallar. Miklar áhyggjur eru þó vegna æfingabanns sem verið hefur á höfuðborgarsvæðinu.

Þetta segir Birgir Jóhannsson, framkvæmdastjóri Íslensks toppfótbolta (hagsmunasamtaka félaga í efstu deildum karla), í þættinum Harmageddon á X-inu 977. Hlusta má á viðtalið hér að neðan.

Klippa: Harmageddon - Birgir hjá ÍTF um framhald fótboltans

Æfingabann hefur verið á höfuðborgarsvæðinu síðustu tvær vikur vegna kórónuveirufaraldursins. Í gær máttu æfingar liða hefjast að nýju en með ströngum skilyrðum, meðal annars um tveggja metra reglu.

Ekki er útlit fyrir að hefðbundnar æfingar á höfuðborgarsvæðinu geti hafist fyrr en 4. nóvember og Birgir segir að þetta verði að breytast. Auk þess hafa lið utan höfuðborgarsvæðisins getað æft óáreitt og geta gert það áfram, svo þar skapast ójafnvægi.

Ný leikjadagskrá ætti að birtast í dag en Birgir segir að stefnt sé að því að byrja aftur að spila fljótlega eftir að núgildandi reglugerð heilbrigðisráðherra renni út 4. nóvember.

Alls enginn undirbúningur fyrir leiki þar sem tugir milljóna eru í húfi

„Það er gert ráð fyrir því að leikirnir byrji strax helgina eftir það, en faglega séð er það allt of stuttur fyrirvari fyrir félögin. Leikmenn sem hafa verið í pásu í mánuð, að því gefnu að þeir byrji að æfa 4. nóvember, geta ekki byrjað að spila 8. nóvember,“ segir Birgir við Harmageddon. Ekki sé nóg að leikmenn hafi verið að æfa einir eða með tveggja metra millibili hver frá öðrum:

„Það er alls enginn undirbúningur fyrir leiki þar sem að allt er kannski undir. Til að mynda Evrópusæti sem telur hátt í 40 milljónir króna, eða leikir sem ráða því hvaða lið fara upp eða niður. Það eru miklir fjármunir í húfi. Við verðum að tryggja að við gerum þetta faglega, líka vegna hagsmuna leikmanna sem eru á öllum aldri og geta átt erfitt með að keyra sig í gang í þriðja sinn,“ segir Birgir.

Óánægja vegna þess að sum lið geta æft en ekki önnur

Hann segir ekki hafa verið mikil átök um þá ákvörðun að reyna að klára mótið:

„Nei, í raun voru langflestir sammála því að vilja klára mótið. Að láta úrslitin ekki ráðast á einhverri reglugerð um að nóg sé að 2/3 hluti leikja sé búinn. En menn vilja líka að mótið sé klárað á skynsamlegan og faglegan hátt. Um það stendur styrinn. Félög utan höfuðborgarsvæðisins mega æfa en félögin á höfuðborgarsvæðinu ekki.“

Skagamenn hafa að litlu að keppa en þeir hafa getað æft síðustu vikur, öfugt við liðin á höfuðborgarsvæðinu.VÍSIR/BÁRA

„Það þarf að leysa þennan hnút, að félögin fái öll að æfa og sitji við sama borð. Í grunninn voru félögin sammála því að klára mótið, en svo var mismunandi sýn á það hvað væri faglegt og hvernig hægt væri að klára þetta. Auðvitað litast menn af sinni stöðu og það er bara eðlilegt,“ segir Birgir.

Búið spil ef fótboltabann lengist

Erlendir leikmenn liða eru sumir hverjir farnir heim og varla verður hægt að spila leiki á grasvöllum í nóvember, svo lið eins og Vestri gæti þurft að spila heimaleik á Dalvík í stað þess að vera heima á Ísafirði.

Aðspurður hvort hægt sé að segja að tímabilið sé marktækt í ljósi þessa, bendir Birgir á að lið eins og Víkingur R. og ÍA hafi þegar verið búin að selja leikmenn þar sem þau hafi kannski haft að litlu að keppa. Félögin verði að ráða því sjálf hvaða leikmenn þau noti:

„Allt þetta tímabil er náttúrulega búið að vera, ég ætla ekki að segja einhver þvæla, en þetta er þriðja stoppið okkar. Að því gefnu að félögin fái öll að æfa getum við sagt að þau sitji við sama borð. Auðvitað eru einhver félög búin að losa sig við leikmenn, sérstaklega í neðri deildum, en það er hlutur sem að félögin taka sjálf ákvörðun um. Auðvitað veikir það viðkomandi lið en það er voðalega lítið hægt að gera í því.“

Aðspurður hvað yrði ef að ekki reyndist mögulegt að hefja æfingar og keppni að nýju frá og með 4. nóvember, vegna ákvarðana heilbrigðisyfirvalda, var svar Birgis nokkuð afdráttarlaust:

„Án þess að fullyrða of mikið þá sé ég ekki hvernig ætti þá að vera hægt að klára þetta.“


Tengdar fréttir

KSÍ ætlar að klára Íslandsmótið

Svo lengi sem takmarkanir á æfingum og keppni verði afnumdar eigi síðar en 3. nóvember ætlar KSÍ að klára Íslandsmótið í fótbolta.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.