Sport

Meistararnir töpuðu óvænt og Kúrekarnir frá Dallas urðu fyrir miklu áfalli

Óskar Ófeigur Jónsson skrifar
Dak Prescott var grátandi þegar hann var keyrður af velli á hnjaskvagninum. Gríðarlegt áfall fyrir bæði hann og lið Dallas Cowboys.
Dak Prescott var grátandi þegar hann var keyrður af velli á hnjaskvagninum. Gríðarlegt áfall fyrir bæði hann og lið Dallas Cowboys. AP/Michael Ainsworth

NFL-meistarar Kansas City Chiefs urðu að sætta sig við sitt fyrsta tap á tímabilinu í gær þegar liðið tapaði 32-40 á heimavelli á móti Las Vegas Raiders. Chiefs liðið var búið að vinna þrettán leiki í röð og þar á meðal var sigurinn í Super Bowl í febrúar.

Meistararnir náðu ekki að stoppa hlauparann Josh Jacobs sem skoraði tvö snertimörk fyrir Las Vegas Raiders liðið í lokaleikhlutanum.

Seattle Seahawks er eina liðið sem hefur unnið fimm fyrstu leiki sína eftir 27-26 endurkomusigur á Minnesota Vikings. Russell Wilson, leikstjórnandi Seahawks liðsins, hélt áfram að spila vel og hann tryggði sínu liði sigur með því að senda snertimarkssendingu á D.K. Metcalf tuttugu sekúndum fyrir leikslok.

Dallas Cowboys vann nauman sigur á New York Giants, 37-34, en Kúrekarnir urðu fyrir miklu áfalli þegar leikstjórnandinn Dak Prescott meiddist illa á ökkla í þriðja leikhluta. Hann fór grátandi af velli og beint upp á spítala þar sem hann fór í aðgerð án hans.

Dak var búinn að eiga frábært tímabil til þessa en spilar ekki fleiri leiki á þessari leiktíð. Dak Prescott var enn að bíða eftir langtímasamningi við Dallas Cowboys og eru meiðslin því enn meira áfall fyrir vikið.

Pittsburgh Steelers er líka búið að vinna alla leiki sína eins og Seattle Seahawks en liðið hefur bara spilað fjóra leiki. Steelers vann 38-29 sigur á Philadelphia Eagles í gær þar sem nýliðinn Chase Claypool skoraði fjögur snertimörk eftir sendingar frá reynsluboltanum Ben Roethlisberger. Þetta er í fyrsta sinn síðan 1979 sem Steelers liðið vinnur fjóra fyrstu leikina.

Cleveland Browns vann 32-23 sigur á Indianapolis Colts og hefur þar með unnið fjóra af fyrstu fimm leikjum sínum sem er besta byrjun félagsins frá 1995. Baltimore Ravens hefur líka unnið fjóra af fimm fyrstu leikjum sínum eftir 27-3 sigur á Cincinnati Bengals. Varnarmenn Ravens liðsins náðu að fella nýliðann og leikstjórnandann Joe Burrow sjö sinnum í leiknum.

Ein allra athyglisverðustu úrslitin voru þó 43-17 útisigur Miami Dolphins á San Francisco 49ers. Leikstjórnandinn Ryan Fitzpatrick var frábær í liði Miami Dolphins en kollegi hans hinum megin, Jimmy Garoppolo, var settur á bekkinn eftir að hann kastaði boltanum frá sér í tveimur sóknum í röð í fyrri hálfleiknum.

Atlanta Falcons rak bæði þjálfarann Dan Quinn og framkvæmdastjórann Thomas Dimittroff eftir 23-16 tap á heimavelli á móti Carolina Panthers en Fálkarnir hafa tapað öllum fimm leikjum sínum á tímabilinu.'

Atlanta var annað félagið til að reka bæði þjálfarann og framkvæmdastjórann en það gerði líka Houston Texans. Romeo Crennel tók við liðinu tímabundið og stýrði Houston Texans til 30-14 sigur á Jacksonville Jaguars. Þetta var fyrsti sigur liðsins á leiktíðinni.

Úrslitin í NFL-deildinni í gær:

  • Seattle Seahawks - Minnesota Vikings 27-26
  • Atlanta Falcons - Carolina Panthers 16-23
  • Baltimore Ravens - Cincinnati Bengals 27-3
  • Houston Texans - Jacksonville Jaguars 30-14
  • Kansas City Chiefs - Las Vegas Raiders 32-40
  • New York Jets - Arizona Cardinals 10-30
  • Pittsburgh Steelers - Philadelphia Eagles 38-29
  • Washington Football Team - Los Angeles Rams 10-30
  • San Francisco 49ers - Miami Dolphins 17-43
  • Cleveland Browns - Indianapolis Colts 32-23
  • Dallas Cowboys - New York Giants 37-34
NFL


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.