Lífið

Sirrý afhenti Líf og Krafti sex milljóna söfnunarfé göngunnar

Sylvía Rut Sigfúsdóttir skrifar
Drífurnar með ávísunina.
Drífurnar með ávísunina. Vísir/Vilhelm

Sirrý Ágústsdóttir afhenti á Kjarvalsstöðum í dag félögunum Líf og Krafti söfnunarféð vegna áheitagöngunnar Lífskraftur.  Sirrý þveraði Vatnajökul ásamt hópnum Snjódrífunum í júní og hópstjórar ferðarinnar voru þær Vilborg Arna Gissurardóttir pól- og Everestfari og Brynhildur Ólafsdóttir Landvættaþjálfari og þrautreyndur fjallaleiðsögumaður. Hópurinn safnaði sex milljónum sem skiptast á félögin tvö.

Sirrý afhenti Ingrid Kulhman, formanni Lífs styrktarfélags og Elínu Söndru Skúladóttur, formanni Krafts styrkinn á Kjarvalsstöðum í hádeginu.  Sjálf hefur hún sigrast tvisvar á krabbameini. 

Sirrý var greind með leghálskrabbamein árið 2010 en sigraðist á meininu. Árið 2015 greindist hún aftur og var sagt að krabbameinið væri krónískt og að hún ætti eitt til þrjú ár eftir ólifuð. Sirrý lauk meðferð árið 2016 og hefur verið við góða heilsu síðan. Hún fagnaði þeim tímamótum að vera án krabbameins í fimm ár, með því að þvera Vatnajökul og setja af stað styrktarátak. 

Vilborg Arna Gissurardóttir og Sirrý ÁgústsdóttirVísir/Vilhelm

Kraftur, félag ungs fólks með krabbamein, og Líf, styrktarfélag kvennadeildar Landspítalans, hjálpuðu Sirrý í veikindunum og vildi hún því gefa til baka með þessum hætti. Samhliða söfnuninni hvatti Sirrý fólk til að taka þátt í eigin Lífskraftsgöngu í sinni heimabyggð á sama tíma. 

Markmiðið göngunni var jafnframt að minna á mikilvægi útivistar og sjálfseflingar í endurhæfingu eftir veikindi. Ennfremur stóð til að ganga á hæsta tind Íslands, Hvannadalshnjúk (Kvennadalshnjúk), með 100 konum en vegna Covid faraldursins þá var göngunni frestað til ársins 2021.

Hópurinn náði sínu markmiði og þveraði Vatnajökul á tíu dögum, 165 kílómetra leið frá Jökulheimum þvert yfir jökulinn í austurátt að Eyjabakkajökli. 

„Það er framtíðarsýn okkar hjá LÍF að söfnunarféð fari í að útbúa margnota stofu sem myndi nýtast fyrir konur í krabbameinsmeðferð sem þurfa að fara í einangrun en einnig fyrir til dæmis deyjandi konur og aðstandendur þeirra,“ sagði Ingrid eftir að hópurinn lauk göngunni. 

„Okkar hluti söfnunarfésins mun fara í okkar LífsKraftsverkefni, í bókina okkar LífsKraft – Fokk ég er með krabbamein - sem er bók með hagnýtum upplýsingum fyrir þá sem greinast með krabbamein og aðstandendur. Bókin er gefin á öllum krabbameinsdeildum Landspítalans. Svo styrkfjárhæðin mun fara í að halda við bókina og efla fræðslustarfið hjá félaginu,“ sagði þá Hulda Hjálmarsdóttir framkvæmdastjóri Krafts.

Snjódrífur koma til Reykjavíkur eftir Vatnajökulsgöngu. Vísir/Vilhelm

Í gönguhópnum með Sirrý, Vilborgu og Brynhildi voru þær Anna Sigríður Arnardóttir, Birna Bragadóttir, Heiða (Nikita) Birgisdóttir, Hólmfríður Vala Svavarsdóttir, Hulda Hjálmarsdóttir, Karen Kjartansdóttir, Soffía S. Sigurgeirsdóttir og Þórey Vilhjálmsdóttir. Verndarar leiðangursins voru Áslaug Arna Sigurbjörnsdóttir dómsmálaráðherra og Gunnar Þórðarson, afi Sirrýjar.


Tengdar fréttir

Bútaði niður Vatnajökul eins og veikindin

Ellefu konur, flestar á fimmtugsaldri slógu met þegar þær þveruðu Vatnajökul á átta dögum. Þær kalla sig Snjódrífurnar og hafa nú þegar safnað um fimm milljónum króna fyrir félögin Kraft og Líf.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.