Erlent

„Ég held að vísindin viti það ekki, í rauninni“

Samúel Karl Ólason skrifar
Gavin Newsom, ríkisstjóri Kaliforníur, og Donald Trump, forseti Bandaríkjanna, á fundi í gær.
Gavin Newsom, ríkisstjóri Kaliforníur, og Donald Trump, forseti Bandaríkjanna, á fundi í gær. AP/Andrew Harnik

Donald Trump, forseti Bandaríkjanna, endurvakti í gær afstöðu sína um að slæm umhirða skóga leiði til gróðurelda og að þörf sé á að raka skóglendi til að sporna gegn þeim. Forsetinn segist ósammála því að loftslagsbreytingar af mannavöldum hafi gert ástandið verra en áður en ástandið á vesturströnd Bandaríkjanna þykir sögulegt og hefur ekki verið verra í manna minnum.

Met hafa verið slegin í Kaliforníu, Oregon og Washington þar sem gróðureldar hafa breitt gífurlega mikið og hratt úr sér. Tugir eru látnir og fer þeim fjölgandi.

Trump ferðaðist til Kaliforníu í gær þar sem hann ræddi við ráðamenn. Þeir hvöttu hann til að hugsa um loftslagsbreytingar og hvaða áhrif það hefði.

„Ef við hunsum vísindin og stingum hausnum í sandinn og höldum að þetta snúist um umhirðu skóga, mun okkur ekki takast að vernda íbúa Kaliforníu í sameiningu,“ sagði Wade Crowfoot, forstöðumaður umhverfisstofnunar Kaliforníu.

Trump svaraði um hæl og sagði: „Það mun kólna, vittu bara til.“

Crowfoot sagðist óska þess að vísindin styddu mál forsetans.

„Ég held að vísindin viti það ekki, í rauninni,“ sagði Trump þá.

Sérfræðingar sem AP fréttaveitan ræddi við segja þá staðhæfingu Trump um að heimurinn muni kólna fara gegn raunveruleikanum. Hækkandi hitastig og verri þurrkar í Kaliforníu og víðar séu í takt við loftslagsbreytingar.

Til marks um það hafa fimm stærstu gróðureldar Kaliforníu logað á undanförnum þremur árum og var hitamet sett í ríkinu í ágúst.

„Kannski er til hliðstæður alheimur þar sem pottur á logandi hellu kólnar, en það er ekki í okkar alheimi,“ sagði vísindamaðurinn Chris Field.

Gróðureldarnir hafa orðið að pólitísku bitbeini í Bandaríkjunum og gagnrýndi Joe Biden, mótframbjóðandi Trump, forsetann harðlega fyrir afstöðu sína.

„Þetta er enn ein krísan. Önnur krísa sem hann mun ekki bera ábyrgð á,“ sagði Biden. Hann sagði einnig að afstaða Trump varðandi loftslagsbreytingar væri ekki að valda eldum og fellibyljum. Hann sé þó ekki tilbúinn til að grípa til aðgerða til að sporna gegn loftslagsbreytingum og undir stjórn hans muni hamförum sem þessum halda áfram að fjölga.

Biden kallaði Trump „loftslags brennuvarg“.

Trump hefur lengi haldið því fram að stærsta ástæðan fyrir skógareldum á vesturströnd Bandaríkjanna sé að dauðar greinar og tré séu ekki rakaðar á brott. Umhirða skóga sé ekki nægjanleg. Hann hefur sömuleiðis sagt loftslagsbreytingar vera „gabb“ sem runnið sé undan rifjum Kínverja og sé ætlað að grafa undan efnahagi Bandaríkjanna.

Hann hefur endrvakið þær yfirlýsingar sínar á undanförnum dögum og sagðist hann sömuleiðis hafa rætt við leiðtoga stórs Evrópuríkis sem sagði að þrátt fyrir að tréin í viðkomandi ríki væru líklegri til að brenna, væru skógareldar sjaldgæfari vegna mikillar umhirðu.

„Þegar tré falla, eftir skamman tíma verða þau mjög þurr, um 18 mánuði, þau verða mjög þurr. Þau verða, í rauninni, eins og eldspýtur,“ sagði Trump. Hann sagði enn fremur að tréin springi í raun í loft upp. 

Trump nefndi ekki umræddan þjóðarleiðtoga á nafn. Hann hefur þó áður haldið því fram að forseti Finnlands hafi sagt eitthvað svipað, en því neitaði sá.


Tengdar fréttir

Tuga saknað vegna eldanna í Oregon

Yfirvöld í Oregon-ríki í Bandaríkjunum segja að tuga fólks sé saknað vegna skógar- og gróðureldanna sem loga glatt í ríkinu. Eldar loga einnig í fleiri ríkjum, en hvað mest í Kaliforníu og Washington.

Rekja gróður­eld til kynaf­hjúpunar­teitis í Kali­forníu

Yfirvöld í Kaliforníu telja að reykvél sem væntanlegri foreldrar notuðu þegar þeir tilkynntu um kyn barns síns hafi verið kveikjan að nokkrum þeirra gróðurelda sem nú geisa í ríkinu. Söguleg hitabylgja gengur nú yfir Kaliforníu sem hefur skapað kjöraðstæður fyrir elda.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.