Allir klárir í slaginn gegn Belgum: „Þurftum að endurheimta mikla orku“

„Kannski getum við komið á óvart,“ sagði Erik Hamrén, landsliðsþjálfari Íslands, fyrir leikinn við Belgíu í Þjóðadeildinni í fótbolta. Hann segir alla leikmenn íslenska hópsins klára í slaginn í kvöld.

Leikur Belgíu og Íslands hefst kl. 18.45 og er í beinni útsendingu á Stöð 2 Sport. Ljóst er að Ísland á afar erfitt verkefni fyrir höndum enda Belgía í efsta sæti heimslistans auk þess sem að Ísland er án fjölda byrjunarliðsmanna.

Hamrén vildi lítið sem ekkert gefa uppi um byrjunarlið sitt, og hvað þá hvort að hann yrði með þrjá miðverði í vörninni eins og síðast þegar Ísland mætti Belgíu:

„Ég get nú ekki sagt mikið um það heldur. Við verðum að vera góðir í vörninni. Síðast spiluðum við hérna með fimm í vörn, með þrjá miðverði, en við sjáum til hvað við gerum núna. Það felast áskoranir í þeim gæðum sem Belgar hafa og við verðum að reyna að bregðast við þeim,“ sagði Hamrén.

„Leikmennirnir áttu meira skilið“

Belgía vann Danmörku í Kaupmannahöfn á laugardag, 2-0, en Ísland varð að sætta sig við 1-0 tap gegn Englandi.

„Menn voru mjög vonsviknir eftir leikinn við England. Leikmenn voru sáttir við sína frammistöðu – ég var mjög ánægður með hana, liðsandann og samvinnuna – en þegar menn fá ekkert þá er maður vonsvikinn. Leikmennirnir áttu meira skilið og við vorum mjög nálægt því að taka stig. Við þurftum því að endurheimta mikla orku í liðið, bæði í hugann og líkamann, og undirbúa okkur fyrir þennan leik,“ sagði Hamrén sem telur Belgíu og England tvö af sigurstranglegustu liðunum fyrir EM á næsta ári. 

Hamrén segir allt þurfa að ganga upp í kvöld til að Ísland eigi von um að ná í stig:

„Besta tækifærið fyrir okkur til að skora er úr skyndisóknum, og einnig úr föstum leikatriðum. Þar eru alltaf tækifæri fyrir lægra skrifuð lið til að gera út af við þau stærri. Við getum verið mjög góðir í föstum leikatriðum.

Ég verð ánægður ef að við getum verið sáttir með frammistöðuna eftir leik. Ef að menn geta sagt „ég gerði allt sem ég gat. Ég sýndi gæði og hugrekki.“ Það er ekki hægt að gera meira. En ef það gerist þá eigum við möguleika á góðum úrslitum,“ sagði Hamrén en viðtalið má sjá hér að neðan.