Innlent

„Síðan koma lægðirnar hver af annarri“

Sunna Kristín Hilmarsdóttir skrifar
Haustveður í Reykjavík
Haustveður í Reykjavík Foto: Vilhelm Gunnarsson/Vilhelm Gunnarsson

Þær eru heldur haustlegar spárnar fram á laugardagsmorgun en þá lægir víða og léttir til.

„Síðan koma lægðirnar hver af annarri,“ eins og segir í hugleiðingum veðurfræðings á vef Veðurstofu Íslands enda er sá tími ársins genginn í garð þar sem lægðirnar eru tíðari og dýpri.

Í dag nálgast lægð austanvert landið og vindur er því vaxandi úr norðaustri. Þá fer að rigna sunnan og vestan til seinni partinn.

„Á morgun herðir enn á norðanáttinni og rignir þá fyrir norðan og austan og kólnar heldur. Má búast við slyddu eða snjókomu til fjalla annað kvöld og nótt, þ.a. færð gæti spillst á fjallvegum. Á föstudag er hann lagstur í hvassa norðvestanátt og bætir enn í úrkomu norðaustanlands,“ segir á vef Veðurstofunnar.

Veðurhorfur á landinu:

Hæg breytileg átt og smá skúrir, en gengur í norðaustan 8-13 m/s á Vestfjörðum. Norðan og norðaustan 8-15 m/s síðdegis, hvassast NV til og fer að rigna S og A til.

Snýst í norðan og norðvestan 15-23 á morgun, hvassast SA til. Rigning N- og A-lands og slydda til fjalla um kvöldið, en annars úrkomulítið. Hiti 5 til 14 stig, hlýjast S-lands.

Á fimmtudag:

Gengur í norðan 13-18 m/s, en 15-20 um kvöldið. Talsverð rigning á N- og A-landi, en annars úrkomulítið. Hiti 5 til 12 stig, hlýjast syðst.

Á föstudag:

Norðvestan 15-23 m/s, hvassast SA til. Talsverð eða mikil rigning á NA-verðu landinu og slydda eða snjókoma til fjalla, en annars þurrt að kalla. Dregur smám saman úr vindi og léttir til S- og V-lands seinni partinn. Hiti 2 til 10 stig, svalast fyrir norðan.

Á laugardag:

Breytileg átt, 3-8 m/s og bjartviðri, en lítilsháttar væta við NA-ströndina. Hlýnar heldur í veðri.

Á sunnudag:

Gengur í allhvassa eða hvassa sunnanátt með talsverðri rigningu, en lengst af þurrt NA til. Fremur hlýtt í veðri.

Á mánudag:

Útlit fyrir suðvestanhvassviðri með rigningu eða skúrum, en þurrviðri eystra og kólnar í veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×