„Mér finnst þetta töff en ekki tíma­bært“

Margrét Lára Viðarsdóttir, segir að henni hafi litist vel á að Selfoss hafi ætlað sér gullið í Pepsi Max deild kvenna en spyr sig hvort að það hafi verið tímabært.

Gengi Selfoss var til umræðu í Pepsi Max mörkum kvenna í gærkvöldi þar sem Helena Ólafsdóttir, Kristín Ýr Bjarnadóttir og Margrét Lára Viðarsdóttir fóru yfir stöðuna.

Helena spurði hvort að Alfreð Elías Jóhannsson væri byrjaður að íhuga stöðu sína hjá Selfoss sem er nær fallsæti en toppnum.

„Hugarfarið hans væri hrikalega vont, í þessari stöðu, ef svo væri. Ef hann væri með svona hugarfar þá gæti hann labbað út,“ sagði Kristín Ýr Bjarnadóttir.

„Þetta eru vonbrigði fyrir liðið og þær gefa það út fyrir tímabilið að þær ætli sér toppsætið. Þær unnu meistari meistaranna og það gaf þeim blóð á tennurnar,“ sagði Margrét Lára og hélt áfram:

„Þær eiga bikarinn eftir og eiga þar Val á heimavelli. Auðvitað eru þetta vonbrigði og vonbrigði fyrir leikmenn að koma og kannski standa ekki undir því sem þær ætluðu að standa undir en aftur; það er ágúst og fullt af leikjum eftir.“

„Ég held að þær nái ekki Breiðablik eða Val en þriðja sætið er möguleiki. Ásættanlegt eða ekki, mér finnst það ásættanlegt. Við spáðum þeim þannig en ekki þær. Spilamennskan á köflum er góð en það sýnir að þessi deild er orðin það sterk að það er mjög erfitt að koma inn og fá 1-4 leikmenn og vinna deildina.“

Margrét Lára bendir á að það taki dágóðan tíma í að búa til góð lið og bendir á toppliðin tvö.

„Sjáiði bara liðið hans Þorsteins og liðið hans Péturs. Vals-liðið tók ansi mikinn tíma í að byggja það upp. Þetta tekur bara tíma og menn verða að gefa sér það. Selfoss-liðið, Íslandsmeistarar eftir eitt eða tvö ár? Já, mögulega.“

„Í ár væri það framar vonum því þetta er ekki svo auðvelt að ætla bara taka að titil á einu ári þegar þú ert að keppa við lið eins og Val og Breiðablik.“

Margrét Lára sagði þó að henni hafi litist vel á að Selfoss-liðið ætlaði sér bara alla leið en setur spurningarmerki um hvort þetta hafi verið rétti tímapunkturinn.

„Mér finnst þetta töff en ekki tímabært,“ sagði Margrét Lára.