Innlent

Afbókuðu ferðir eftir breyttar reglur á landamærunum

Sylvía Hall skrifar
Norræna við hafnarbakkann á Seyðisfirði. Myndin er úr safni.
Norræna við hafnarbakkann á Seyðisfirði. Myndin er úr safni. Vísir/Vilhelm

Nokkur fjöldi farþega Norrænu afbókaði ferðir sínar í gær þegar breyttar reglur varðandi komur ferðamanna til landsins voru kynntar fyrir þeim. Stuttur fyrirvari gerði starfsfólki Norrænu erfitt fyrir að koma skilaboðunum áleiðis til farþega sem áttu bókaða ferð til Íslands.

Linda Björk Gunnlaugsdóttir, framkvæmdastjóri Smyril Line á Íslandi segir samtal milli fyrirtækisins og stjórnvalda vera mjög gott en í þetta skipti hafi fyrirvarinn einfaldlega verið of stuttur fyrir alla. Hertar aðgerðir voru kynntar á föstudag og útfærsla á breyttum reglum hafi ekki legið almennilega fyrir fyrr en á mánudag.

Linda Björk Gunnlaugsdóttir, framkvæmdastjóri Smyril Line á Íslandi.Smyril Line

„Fólk er farið af stað sem er að fara í Norrænu. Það var alveg ótrúlega lítill fyrirvari á því að geta látið þau vita að reglurnar væru breyttar,“ segir Linda í samtali við Vísi. Hún segir starfsfólk hafa sent út SMS og tölvupósta og síðan dreift útprentuðum blöðum til farþega þegar þeir komu til Hirsthals í Danmörku með helstu upplýsingum varðandi tvöfalda skimun og sóttkví. Þar hafi farþegum verið gert ljóst að þeir gætu ekki verið í sóttkví á tjaldstæðum.

„Það urðu töluvert af afbókunum í gær við skipið. Þetta er allt öðruvísi viðskiptahópur sem er að koma með skipi heldur en flugi. Þetta er fólk sem er búið að undirbúa ferðina í lengri tíma og leggja af stað með meiri fyrirvara heldur en fólk sem er að fara í flug.“

Ákjósanlegra ef farþegar gætu verið í sóttkví á tjaldstæðum 

Linda bendir á að sá hópur sem ferðast með Norrænu er oft í eldri kantinum og því sé ekki hægt að treysta á að upplýsingar skili sér samstundis með tölvupósti, enda ekki allir sem skoði hann reglulega. Líkt og áður sagði hafi margir lagt af stað með miklum fyrirvara og breyttar reglur setji plön margra í uppnám.

Eftir að hertar aðgerðir á landamærunum tóku gildi í dag þurfa allir farþegar að fara í tvær sýnatökur og dvelja 4-5 daga í sóttkví. Ákveðnar kröfur eru gerðar til þeirra staða sem fólk dvelur á í sóttkví og má til að mynda hvorki stoppa í vegasjoppum né nota sameiginlega salernisaðstöðu. Þannig er ekki heimilt að dvelja á tjaldstæðum.

Linda segir það hafa verið ákjósanlegra fyrir marga farþega að geta verið á tjaldstæðum, enda margir farþegar Norrænu sem ferðast með húsbíla og fellihýsi. „Það hefði hentað okkar viðskiptamönnum mjög vel ef það væri hægt að taka sóttkvína á tjaldstæði.“

Í næstu viku mun Norræna byrja að sigla eftir vetraráætlun og mun skipið stoppa lengur í hvert skipti. Linda segir þann farþegahóp vera mikilvægan fyrir ferðaþjónustuna á Austurlandi og samtal sé hafið við sóttvarnayfirvöld hvort hægt sé að finna útfærslu á því.

„Þá gistir það um borð og fer í ferðir þar sem það heimsækir ferðamannastaði á Austurlandi og er þá að borða og skoða útsýnisstaðina, en samkvæmt þessu má fólk ekkert fara úr rútunni.“


Tengdar fréttir

Sér fyrir sér skimanir á meðan veiran er í vexti er­lendis

Nýjar reglur um skimanir á landamærum tóku gildi á miðnætti. Fjórum ferðum Icelandair hefur verið aflýst í dag. Sóttvarnalæknir sér fyrir sér hertar takmarkanir á landamærum um mánaðabil eða á meðan veiran er í vexti erlendis.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.