Ætluðu að hafa sex hótel opin í vetur en þurfa að endurmeta

Davíð Torfi Ólafsson framkvæmdastjóri Íslandshótela segir fátt annað í stöðunni en að samþykkja þau ferðatakmörk sem yfirvöld hafa kynnt að sett verði á ferðir hingað til lands. Áformað var að sex a sautján hótelum keðjunnar yrði opin í vetur en verið er að endurskoða það eftir ákvörðun ríkisstjórnarinnar.

Á föstudaginn voru kynntar nýjar reglur sem taka gildi á miðvikudaginn. Þá munu allir þeir sem koma hingað til lands fara í tvær skimanir og fjögurra til fimm daga sóttkví á milli skimana. Ferðaþjónustan telur kvaðirnar samsvara því að landinu hafi verið lokað aftur fyrir ferðamönnum. Fáum hugnist að koma hingað til lands til þess eins að loka sig af í fjóra til fimm daga.

„Þetta er auðvitað mjög erfitt í alla staði en ég hef verið að horfa á þetta þannig að þetta er ákvörðun sem er tekin út frá heilbrigðissjónarmiðum. Þetta telja menn að sé rétt í stöðunni að gera,“ sagði Davíð Torfi í Bítinu í morgun aðspurður um hvernig honum litist á stöðuna eftir ákvörðun ríkisstjórnarinnar.

„Það er alveg sama hvað maður er ósáttur þó að kannski hafi þetta ekki verið að koma með ferðamönnum, allavega erlendum ferðamönnum, inn og smita þannig þá held ég að við verðum bara að bakka upp þessa aðgerð og reyna að sníða stakk eftir vexti,“ sagði Davíð Torfi sem virtist líta á björtu hliðarnar.

Þannig vonaðist hann til þess að með því að herða aðgerðir á landamærum gæti lífið innanlands smám saman tekið á sig eðlilega mynd.

„Og kannski helst að horfa þannig á að hér nái samfélagið að þróast með eðlilegum hætti og hægt að rólega getum við aflétt höftum, skólar gengið almennilega og innanlandsmarkaðurinn, fundir, ráðstefnur, jólahlaðborðin og allt þetta gengi með eðlilegu sniði og svo bara hægt og rólega eftir áramótin förum við að opna eftir því sem fram vindur í löndunum í kringum okkur,“ sagði Davíð Torfi.

Framundan er fundur Íslandshótela og skuldabréfaeigenda þar sem hótelkeðjan mun sækjast eftir því að breyta skilmálum, sem felur meðal annars í sér greiðslufrystingu á næstu fjórum gjalddögum. Í greinargerð með tillögu Íslandshótela kom fram að viðskiptabanki hótelkeðjunnar hefði veitt fyrirtækinu ákveðnar tilslakanir, og standa vonir til að skuldabréfaeigendur geri slíkt hið sama.

Alls eru 17 hótel í rekstri Íslandshótela, en þau hafa ekki verið öll opin í sumar.

„Það er búið að vera mikið stuð hjá okkur í sumar, júní, júlí og ágúst búnir að vera mjög góðir. Innanlandsmarkaðurinn hefur tekið vel við sér en við höfum samt bara getað starfrækt níu hótel af sautján,“ sagði Davíð Torfi. Sex hótel áttu að vera opin í vetur en ákvörðun ríkisstjórnarinnar gæti haft áhrif á það.

„Við erum aðeins að endurmeta stöðuna núna hvað verður,“ sagði Davíð Torfi. Aðeins eitt hótel af sex, Grand Hótel, hefur verið opið í sumar.

Davíð Torfi var einnig spurður um hvort að herðar aðgerðir á landamærunum myndu þýða uppsagnir á starfsfólki, sagði hann hótelkeðjuna einfaldlega vera að reikna dæma upp á nýtt eftir tilkynningu föstudagsins.

„Þetta snýst held ég frekar um endurráðningar af því að við auðvitað eins og önnur fyrirtæki höfum verið að nýta þessi útspil frá ríkisstjórninni. Fólkið hjá okkur í sumar hefur flest verið að vinna á uppsögn og nú er bara verið að stilla af og sjá hverja við getum endurráðið. Vonandi getum við endurráðið eins marga og við mögulega getum.“