Mikil óvissa meðal Íslendinga á smithótelinu á Tenerife

Íslendingarnir sjö sem dvelja á Costa Adeje Palace-hótelinu á Tenerife, sem nú er í sóttkví vegna kórónu-smits sem greinst hefur í fjórum hótelgesta, kvarta undan takmarkaðri upplýsingagjöf. Þeir vita ekki hvenær þau losna né hver stefnan sé.

Þetta segir Svali Kaldalóns fararstjóri Tenerife en hann hefur verið í sambandi við fólkið. Hann segir að frá því að þetta kom upp þá hafi þau aðeins fengið tvær tilkynningar.

„Kæru gestir. Okkur þykir leitt að tilkynna ykkur að vegna öryggissjónarmiða sem snúa að heilbrigðismálum hefur hótelinu verið lokað. Verið inni á herbergjum ykkar þar til frekari fyrirskipanir berast frá heilbrigðisyfirvöldum.“

Í þeirri seinni segir að hótelið verði í sóttkví þar til annað kemur á daginn. Heilbrigðisyfirvöld beini því til hótelgesta, vegna öryggis þeirra, að vera á herbergjum sínum. Það sé mjög mikilvægt. Ef hótelgestir verði varir við einhver einkenni þá beri þeim að hafa samband við móttökuna. „Ykkur verður sinnt allan sólarhringinn. Verið róleg, ykkur verður haldið upplýstum um gang mála.“

En, þar eru hinir spánsku hótelhaldarar að lofa upp í ermina á sér, að sögn Svala því upplýsingar eru að öðru leyti en þessu af afar skornum skammti.

Starfsfólk orðið mjög þreytt

„Þau vita í rauninni ekki hvenær þau fá að fara, það hefur ekki verið tilkynnt. Aðstoð innandyra er svona allt í lagi en þá bara í besta falli. Starfsfólkið er orðið mjög þreytt enda ekki fengið neitt breik síðan þetta kom upp,“ segir Svali. En um er að ræða um 800 gesti alls á hótelinu og 200 starfsmenn, sem öll eru föst á hótelinu.

Fólk fær sendan mat uppá herbergi, grímur og fleira í þeim dúr auk þess sem gestum er gert að mæla sig tvisvar á dag. Er það í takti við það sem Magnús Gylfason, sem var fastur í sóttkví á skemmtiferðaskip, sagði frá nýlega.

„Tilmælin eru að vera upp á herbergi en ef þig langar í kaffi þá þarftu að fara niður í matsal,“ segir Svali og telur það skjóta skökku við. En, að hans sögn segja Íslendingarnir að þetta sé allt að koma, það er í því er snýr að skipulagi á hótelinu.

„Það var pínu óðagot á öllum þarna fyrst.“

Þrenn hjón og eitt barn

Þessi sjö manna hópur sem um ræðir er á vegum Vitaferða en þar er framkvæmdastjóri Þráinn Vigfússon. Hann segir að um sé að ræða þrenn hjón og eitt barn. Þráinn segir sóttvarnalækni hafa lýst vel þeirri hættu sem til staðar er, ekki sé hættulegra að fara til Tenerife en hvert á land annað sem er. „Ef fólk er hrætt við að fara til Tenerife ætti það ekki að fara neitt,“ segir Þráinn.

Vitaferðir flaug fullri vél til Tenerife í dag. 183 fóru en 12 afbókanir voru en þar var um að ræða eldra fólk með undirliggjandi sjúkdóma. Og frestuðu því för vegna þess. Í ferð sem fyrirhuguð er á laugardag eru engar afbókanir enn sem komið er. Þráinn segir að aðalfararstjóri þeirra hjá Vitaferðum sé í stöðugu sambandi við hópinn og er líðan þeirra góð eða eftir atvikum, í ljósi þeirrar stöðu sem uppi er að vera læst inni á hótelinu.