Enginn Liverpool maður meðal þeirra fljótustu í ensku úrvalsdeildinni

Það er nóg af eldsnöggum leikmönnum í ensku úrvalsdeildinni og mörg lið deildarinnar eru mjög fljót að snúa vörn í sókn í sínum leikjum. Nú hafa menn komist að því hver sé í raun fljótasti leikmaður ensku úrvalsdeildarinnar.

Leikmenn eins og Mohamed Salah hjá Liverpool og Adama Traore hjá Úlfunum koma strax í hugann sem tveir af þeim allra fljótustu en þeir Salah og Traore komast þó hvorugur inn á topp tíu á þessum lista.

Opta hefur tekið saman þá tíu leikmenn sem hafa náð fljótustu sprettunum í leik í ensku úrvalsdeildinni á þessari leiktíð eða með öðrum orðum fljótustu leikmenn deildarinnar.

Sá hraðasti af öllum í samantekt Opta er miðvörður sem íslensku landsliðsframherjarnir fengu að reyna sig við í undankeppni EM í Istanbul í nóvember.

Sá heitir Caglar Soyuncu og spilar hjá Leicester City. Soyuncu á best sprett upp á 37,55 kílómetra á klukkustund. Leicester á líka tvo aðra leikmenn á topp tíu listanum eða þá Harvey Barnes og Hamza Choudhury.

Næstur á eftir Tyrkjanum er Arsenal maðurinn Ainsley Maitland-Niles en þriðji er síðan Shane Long hjá Southampton sem er vissulega athyglisvert enda orðinn 33 ára gamall. Caglar Soyuncu er tíu árum yngri og Maitland-Niles er bara 22 ára.

Það er ekki bara Mohamed Salah sem kemst ekki á listann því enginn Liverpool maður meðal þeirra fljótustu í ensku úrvalsdeildinni.

Margir knattspyrnustjórar óttast hraðar sóknir Liverpool liðsins og leggjast oft aftarlega á völlinn. Hraðinn er þó meiri á öðrum leikmönnum deildarinnar.

Manchester United á tvo menn á listanum í þeim Fred og Daniel James en menn eins og Anthony Martial eða Marcus Rashford komast ekki á topp tíu listann.

Hröðustu leikmenn ensku úrvalsdeildarinnar til þessa á tímabilinu:

1) Caglar Soyuncu (Leicester City) – 37.55 km/klst

2) Ainsley Maitland-Niles (Arsenal) – 37.46 km/klst

3) Shane Long (Southampton) – 37.35 km/klst

4) Fred (Manchester United) – 37.29 km/klst

5) Phil Foden (Manchester City) – 37.12 km/klst

6) Harvey Barnes (Leicester City) – 37.03 km/klst

7) Kyle Walker (Manchester City) – 36.94 km/klst

8) Hamza Choudhury (Leicester City) – 36.93 km/klst

9) Bjorn Engels (Aston Villa) – 36.91 km/klst

10) Daniel James (Manchester United) 36.9 km/klst

10) Ismaila Sarr (Watford) – 36.9 km/klst