Viðar Örn: "Skemmtilegast að skora í svona leikjum“

Landsliðsframherjinn Viðar Örn Kjartansson reiknar með því að leikur hans í dag sé með þeim stærri á ferlinum en lið hans Yeni Malatyaspor mætir tyrkneska stórveldinu Galatasaray á útivelli í úrvalsdeildinni þar í landi.

Viðar Örn gekk í raðir Yeni Malatyaspor á dögunum en hann kemur á láni frá rússneska liðinu Rostov. Dvöl Viðars í Rússlandi var ekki upp á marga fiska en þessi magnaði markahrókur hefur vart geta hætt að skora síðan hann hélt í atvinnumennsku árið 2013. Þá lá leiðin til Noregs en síðan hefur Viðar Örn spilað í Kína, Svíþjóð, Ísrael, Rússlandi og nú Tyrklandi.

Vísir heyrði í Viðari Erni fyrir leik dagsins en stuðningsmenn Galatasaray eru þekktir fyrir allt annað en að vera vingjarnlegir. Frægt er þegar Manchester United mætti þeim hér á árum áður og voru boðnir velkomnir með borða sem stóð á „Welcome to Hell“ eða „Velkomnir til Helvítis.“

„Ég er virkilega spenntur fyrir leik helgarinnar gegn Galatasaray. Ég hugsa að þetta sé með stærri leikjum, ef ekki sá stærsti, sem maður hefur spilað miðað við allt sem maður hefur heyrt,“ sagði Viðar Örn við Vísir fyrr í vikunni.

„Það voru mögulega fleiri áhorfendur í Kína en ég hugsa að lætin þarna verði töluvert meiri. Það væri því sérstaklega gaman að opna markareikninginn þar en það er skemmtilegast að skora í svona leikjum,“ sagði Viðar Örn ennfremur en hann á enn eftir að þenja netmöskvana í tyrknesku úrvalsdeildina.

Aðspurður út í gengið síðan hann gekk til liðs við félagið og landið sjálft þá sagði Viðar eftirfarandi.

„Ég er nokkuð sáttur með byrjunina hér hjá Yeni (Malatyaspor) en ekki úrslitin. Hvað varðar frammistöðu mína persónulega þá tel ég hana hafa verið fína en við ákváðum fyrir fram að ég myndi ekki spila mikið meira en 60 mínútur þar sem leikformið er ekki nægilega gott. Ég þarf líklega 2-3 vikur í viðbót til að komast í mitt allra besta form.“

„Annars lýst mér mjög vel á hlutina hér í Tyrklandi. Það er skemmtilegt á æfingum og leikirnir í deildinni eru opnir og skemmtilegir. Þá er mikil áhersla lögð á sóknarbolta í deildinni sem hentar mér augljóslega vel. Síðan snýst bókstaflega allt um fótbolta í landinu og það gerir þetta auðvitað enn skemmtilegra,“ sagði Viðar Örn að lokum.

Leikur Galatasaray og Yeni hefst klukkan 16:00 að íslenskum tíma. Fyrir leik dagsins er Galatasaray í 5. sæti deildarinnar með 39 stig þegar 21 umferð er lokið á meðan Yeni er í 10. sæti með 24 stig en liðið á leik til góða.