Handbolti

Einar Jónsson vann tvöfalt í Færeyjum

Runólfur Trausti Þórhallsson skrifar
Einar er hann stjórnaði Gróttu.
Einar er hann stjórnaði Gróttu. Vísir/Daníel

H71, undir stjórn Einars Jónssonar, varð í dag færeyskur bikarmeistari karla og kvenna í handbolta er bikarhelgin fór fram í Höllini á Hálsi í Þórshöfn.

Einar ætti að vera flestum unnendum íslensks handbolta kunnur en hann hefur meðal annars þjálfað Fram, Stjörnuna og Gróttu hér á landi. Hann færði sig til Færeyja eftir að Grótta féll úr Olís deild karla síðastliðið vor. Þar stýrir hann bæði karla- og kvennaliði H71 en bæði lið léku til úrslita í dag.

Kvennaliðið mætti VÍF þar sem H71 vann í rafmögnuðum úrslitaleik. Lokatölur 24-23 eftir að VÍF hafði verið yfir 23-22 þegar fimm mínútur voru til leiksloka. Var þetta fyrsti bikartitill kvennaliðsins í sögu félagsins.

Karlaliðið mætti síðan Kyndil. Þar var spennan ekki jafn mikil og vann H71 á endanum fjögurra marka sigur, 23-19. Þeirra fjórði bikartitill í sögunni.

Þá er vert að nefna að báðum liðum gengur einkar vel í deildinni. H71 situr á toppi efstu deildar karla með 22 stig, sex stigum á undan næsta liði. Kvennalið H71 er svo í 3. sætinu, aðeins tveimur stigum á eftir efsta liði deildarinnar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.