Handbolti

Kristján Andrésson með bestan árangur íslenskra þjálfara á fjórða stórmótinu í röð

Óskar Ófeigur Jónsson skrifar
Kristján Andrésson hefur skilað sænska landsliðinu í 2. til 7. sæti á fjórum stórmótum sínum með liðið.
Kristján Andrésson hefur skilað sænska landsliðinu í 2. til 7. sæti á fjórum stórmótum sínum með liðið. Getty/EPA-EFE/JUANJO MARTIN

Kristján Andrésson endaði landsliðsþjálfaraferil sinn með sigri á Íslandi í lokaleik milliriðils EM í handbolta í gær. Með sigrinum tryggðu Svíar sér sjöunda sætið á Evrópumótinu.

Kristján tók við sænska landsliðinu eftir Ólympíuleikana í Ríó árið 2016 og stýrði því í fyrsta sinn á heimsmeistaramótinu í Frakklandi árið 2017.

Kristján var því að klára sitt fjórða stórmót með sænska landsliðinu í Malmö í gær. Á öllum þessum fjórum mótum hefur Kristján náð bestum árangri af íslensku þjálfurunum á mótinu. Það hafa verið þrír íslenskir þjálfarar eða fleiri á öllum þessum mótum.

Guðmundur Guðmundsson átti möguleika að fara með íslenska landsliðið upp fyrir það sænska með sigri í gær en Svíarnir voru miklu betri og unnu sjö marka sigur.

Sænska liðið endar þar með í sjöunda sæti, fjórum sætum ofar en það íslenska. Erlingur Birgir Richardsson var þriðji íslenski þjálfarinn á mótinu en hollenska liðið endaði í sautjánda sæti undir hans stjórn.

Kristján hafði verið með meira en sex sæta forskot á tveimur stórmótum á undan þessu, sex sætum á undan íslenska landsliðinu á HM í fyrra og heilum ellefu sætum á undan íslenska landsliðinu á Evrópumótinu fyrir tveimur árum.

Síðasti íslenski þjálfarinn annar enn Kristján til að ná bestum árangri íslensks þjálfara á stórmóti var árið 2016 þegar Guðmundur Guðmundsson gerði Dani að Ólympíumeisturum og Dagur Sigurðsson gerði Þjóðverja að Evrópumeisturum.

Hér fyrir neðan má sjá árangur íslenskra þjálfara á síðustu stórmótum í handbolta.

Sæti íslensku þjálfaranna á síðustu stórmótum

EM 2020
7. sæti - Kristján Andrésson með Svíþjóð
11. sæti - Guðmundur Guðmundsson með Ísland
17. sæti - Erlingur Richardsson með Holland

HM 2019
5. sæti - Kristján Andrésson með Svíþjóð
11. sæti - Guðmundur Guðmundsson með Ísland
19. sæti - Patrekur Jóhannesson með Austurríki
20. sæti - Aron Kristjánsson með Barein
24. sæti - Dagur Sigurðsson með Japan

EM 2018
2. sæti - Kristján Andrésson með Svíþjóð
13. sæti - Geir Sveinsson með Ísland
15. sæti - Patrekur Jóhannesson með Austurríki

HM 2017
6. sæti - Kristján Andrésson með Svíþjóð
9. sæti - Dagur Sigurðsson með Þýskaland
10. sæti - Guðmundur Guðmundsson með Danmörku
14. sæti - Geir Sveinsson með Ísland



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.