Innlent

Góðkunningi lögreglunnar klippti á lás og stal rafmagnshlaupahjóli

Vésteinn Örn Pétursson skrifar
Rafmagnshlaupahjól. Myndin er úr safni.
Rafmagnshlaupahjól. Myndin er úr safni. Vísir/Vilhelm

Klukkan hálf sex í gærkvöldi barst lögreglunni á höfuðborgarsvæðinu tilkynning um þjófnað á rafmagnshlaupahjóli í Laugardal. Upptaka náðist af manni klippa á lás og stela hjólinu. Í dagbók lögreglu kemur fram að maðurinn sé þekktur hjá lögreglunni og málið sé í rannsókn.

Þá barst lögreglu tilkynning um mann á reiðhjóli brjóta rúðu í skartgripaverslun við Laugaveg rétt upp úr klukkan fjögur í nótt. Maðurinn er sagður hafa tekið varning úr glugga verslunarinnar og hjólað burt.

Á tólfta tímanum í gærkvöldi var þá tilkynnt um þjófnað og líkamsárás í Breiðholti. Árásarmaðurinn var handtekinn og vistaður í fangageymslu. Sá sem fyrir árásinni varð er sagður með minni háttar áverka. Hann fékk síma sinn aftur, en árásarmaðurinn hafði tekið hann.

Frá klukkan 17 til 5 eru alls 70 mál skráð í dagbók lögreglu. Alls eru sjö mál skráð frá 23 til 2 vegna hárrar tónlistar eða hávaða í samkvæmum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×