Skoska drykkjumálinu lokið

Skoska knattspyrnusambandið mun ekki aðhafast meira í málinu sem varð til þess að Barry Ferguson og Allan McGregor voru settir í ævilangt bann hjá landsliðinu.

Ferguson og McGregor sátu lengi við drykkju á hóteli liðsins eftir leik Skota og Hollendinga fyrir tæpum tveimur vikum og voru í kjölfarið settir á bekkinn fyrir leik Skota gegn Íslendingum á miðvikudaginn í síðustu viku.

Þar náðust myndir af þeim er þeir mynduðu hið svokallaða V-merki og í kjölfarið voru þeir settir í ævilangt bann. Walter Smith, stjóri Rangers, setti þá einnig í tveggja vikna launalaust leyfi og tók fyrirliðabandið af Ferguson.

Þá var einnig greint frá því að fjórir aðrir leikmenn landsliðsins sátu einnig eitthvað frameftir við drykkju umrætt laugardagskvöld. Þeir fóru hins vegar mun fyrr upp í rúmið en hinir tveir.

Stjórn skoska knattspyrnusambandsins fundaði um málið í dag og ákvað að ekkert meira yrði aðhafst í málinu.

„George Burley (landsliðsþjálfari) kom og gaf okkur skýrslu um hvað gerðist á hótelinu sem varð til þess að hafa áhrif á val hans á liðinu fyrir leikinn gegn Íslandi."

„En það verður ekkert meira gert í þessu máli. Stjórnin er sátt við hvernig landsliðsþjálfarinn tók á ástandinu," sagði Compbell Ogilvie, varaforseti skoska knattspyrnusambandsins.