Ragnar Þór segir stjórnendasögu Icelandair einkennast af spillingu

Ragnar Þór Ingólfsson formaður VR dregur ekki af sér í einskonar svari við skrifum Maríu Stefánsdóttur, sölustjóra Icelandair, og segir yfirstandandi stríð um flugfélagið.

Ragnar Þór bætir í gagnrýni sína ef eitthvað er, hann segir yfirstandandi stríð um félagið og ekki verði liðið að þar falli allt í sama farið og fyrr. Stjórnendasaga Icelandair sé vörðuð spillingu. Hann gerir ráð fyrir því að félaginu verði bjargað en það hljóti að vera með skilyrðum.

María ekki sú tegund stjórnenda sem Ragnar Þór talar um

Vísir greindi frá pistli Maríu í gær en þar gagnrýnir hún mjög viðhorf sem Ragnar Þór hefur viðrað gagnvart Icelandair; kallar þau árásir Ragnars á stjórnendur Icelandair. Þá vill hún meina að Ragnar Þór hafi snúið út úr umdeildum orðum Boga Nils Bogasonar forstjóra flugfélagsins þegar hann sagði í bréfi til starfsmanna að það væru þau sjálf sem stæðu endurfjármögnun félagsins fyrir þrifum.

Ragnar Þór hefur nú svarað Maríu, segir pistil hennar lýsa samkennd, einlægni og áhyggjum yfir stöðu starfsfólksins. Hann segist staddur nákvæmlega þar sjálfur en það breyti ekki því að gagnrýni á stjórnendur Icelandair sé fullkomlega réttmæt. María sé stjórnandi hjá Icelandair en ekki „sú gerð stjórnanda sem ég átti við í pistli mínum,“ segir Ragnar; ekki af því tagi sem hann vill beina spjótum sínum að. Og þar bætir Ragnar Þór í og rekur ýmislegt sem hann telur forkastanlega stjórnarhætti.

Lindarvatns-skandallinn

„Þegar ég skrifaði um stjórnendaklíku átti ég t.d. við þegar Björgúlfur Jóhannsson steig til hliðar til að axla ábyrgð á slæmri stöðu félagsins, á mesta góðæristíma flugsögunnar, og rétti kyndilinn yfir í vinstri höndina sem núverandi forstjóri var á þeim tíma.

Björgólfur var líka formaður SA en hann hafði einmitt kippt til sín lykilmönnum úr Icelandair þeim Halldóri Benjamín og Davíð Þorlákssyni frá Icelandair til SA en þessir stjórnendur báru t.d. ábyrgð á Lindarvatns skandalnum á Landssímareitnum þar sem Icelandair keypti eigin viðskiptavild fyrir tæplega tvo milljarða sem flokksvinir þeirra högnuðust gríðarlega á,“ skrifar Ragnar og segir þetta samkvæmt sínum bókum heita klíkustjórnun.

„Ég hefði kannski frekar átt að nota orðið spilling og biðst afsökunar á því. Ég gæti svo skrifað sérstakan pistil um klíkuna í kringum æðstu stjórnendur ef þess er sérstaklega óskað og færa frekari rök fyrir máli mínu.“

Þá segir Ragnar í pistli sínum, sem þegar hefur vakið mikla athygli, að nú ríki heilagt stríð um Icelandair. Þar sem allt sé undir, lífskjör og framtíð.

„Þetta er stríð og nú stendur starfsfólk Icelandair í fremstu víglínu fyrir alla sem á eftir koma. Við höfum allt að vinnu en öllu að tapa, fyrir okkur og komandi kynslóðir.“