Búist við baráttu við upphaf réttarhaldanna gegn Trump

Réttarhöldin yfir Donald Trump, forseta Bandaríkjanna, fyrir meint embættisbrot hans munu hefjast í dag. Fyrst munu öldungadeildarþingmenn, sem eiga að þjóna sem nokkurs konar óhlutdrægir kviðdómendur, greiða atkvæði um reglur réttarhaldanna. Búist er við mikilli baráttu um þær reglur en Repúblikanar hafa gefið í skyn að þeir vilji stutt réttarhöld og að engin vitni verði kölluð til.

Það vilja Demókratar ekki. Þeir vilja vitni og að kallað verði eftir frekari gögnum en ríkisstjórn Trump hefur meinað fjölda embættismanna sem komu að Úkraínumálinu svokallaða að bera vitni. Sömuleiðis kom ríkisstjórnin í veg fyrir að hinar ýmsu stofnanir afhentu gögn til fulltrúadeildarinnar, þar sem meint brot Trump voru rannsökuð.

Repúblikanar eru í meirihluta í öldungadeildinni (53-47). Tvo þriðju þingmanna þarf til að sakfella Trump og vísa Trump úr embætti. Réttarhöldin hefjast klukkan 13 að staðartíma í Washington-borg, eða klukkan 18 á Íslandi.

Tillaga Mitch McConnell, forseta öldungadeildarinnar, sem stendur til að greiða atkvæði um í dag, frestar þó ákvörðun um vitni og gögn og fjallar eingöngu um opnunarræður Demókrata og lögmanna Trump. Samkvæmt tillögunni fær hvor hlið tvo daga í opnunarræður sínar.

Að opnunarræðunum loknum munu þingmenn fá sextán klukkustundir til að spyrja báðar hliðar spurninga og ræða málið sín á milli í fjóra tíma.

Að því loknu stendur til að greiða atkvæði um hvort kalla eigi vitni til. John Roberts, forseti Hæstaréttar Bandaríkjanna, stýrir réttarhöldunum.

Engir símar og bara frí á sunnudögum

Samkvæmt reglum öldungadeildarinnar fá þingmenn einungis frí á sunnudögum á meðan réttarhöldin standa yfir og eru símar alfarið bannaðir í þingsalnum. Þar að auki mega þingmenn ekki tala í salnum á meðan réttarhöldin standa yfir.

Það er nokkuð víst að nokkrir þingmenn séu óánægðari en aðrir með það að sitja fastir í þingsalnum. Elizabeth Warren, Bernie Sanders, Amy Klobuchar og Michael Bennet eru öll í forsetaframboði og stutt er í að forval Demókrataflokksins hefjist formlega í Iowa og New Hampshire.

Sjónvarpað verður úr þingsalnum á meðan réttarhöldin eiga sér stað en meirihluti þingmanna getur ákveðið að stöðva útsendinguna um ótilgreindan tíma, til að ræða vendingar sín á milli. Þingmennirnir sjálfir ákveða svo hvenær útsendingin má hefjast á nýjan leik.

Demókratar hafa ekki tekið tillögum McConnell fagnandi og segja ljóst að hann ætli sér að standa í vegi þess að kalla fleiri til fleiri vitni. Chuck Schumer, leiðtogi Demókrata í öldungadeildinni, segir tillögurnar vera smánarlegar.

Trump er gert að hafa beitt utanríkisstefnu Bandaríkjanna gegn Úkraínu með því markmiði að þvinga Volodymyr Zelensky, forseta Úkraínu til að tilkynna upphaf tveggja rannsókna sem myndu nýtast Trump í kosningunum á næsta ári. Sú viðleitni hafi staðið yfir um mánaða skeið og hafi verið stýrt af Rudy Giuliani, einkalögmanni Trump.

Honum er sömuleiðis gert að hafa staðið í vegi rannsóknar fulltrúadeildarinnar.

Sjá einnig: Trump formlega ákærður fyrir embættisbrot

Demókratar segja Trump hafa ógnað bæði heilindum kosninga í Bandaríkjunum og þjóðaröryggi en rannsókn hefur nú staðið yfir frá því að í ljós kom að Trump hafði haldið aftur af neyðaraðstoð til Úkraínu.

Sjá einnig: Brutu lög með frystingu neyðaraðstoðar til Úkraínu

Hvíta húsið sleppti takinu á neyðaraðstoðinni eftir að kvörtun uppljóstrara vegna símtals Trump og Zelensky var lögð fram.

Vitnisburður embættismanna á síðustu vikum hefur varpað ljósi á að Trump skipaði embættismönnum að vinna með Rudy Guiliani, einkalögmanni hans, varðandi málefni Úkraínu og þvinguðu þeir forsvarsmenn ríkisins til að lýsa því yfir opinberlega að Úkraínumenn ætluðu sér að rannsaka pólitískan andstæðing forsetann og aðra rannsókn sem grafa átti undan Rússarannsókninni svokölluðu og Landsnefnd Demókrataflokksins.

Lítið til í ásökunum Trump

Forsetinn og bandamenn hans hafa sakað Joe Biden um spillingu vegna þess að hann þrýsti á úkraínsk stjórnvöld að reka saksóknara á sama tíma og Hunter, sonur hans, sat í stjórn olíufyrirtækisins Burisma Holdings. Það eigi Biden að hafa gert til að stöðva rannsókn sem beindist að Burisma, samkvæmt kenningu Trump-liða og vill forsetinn að Úkraínumenn rannsaki það.

Ekkert hefur þó komið fram sem bendir til þess að Biden-feðgarnir hafi gert nokkuð ólöglega eða að rannsókn hafi yfir höfuð staðið yfir á Burisma á þeim tíma sem þáverandi varaforsetinn reyndi að koma saksóknara frá. Sú viðleitni var hluti af alþjóðlegum þrýstingi þar sem vestræn ríki töldu saksóknarann ljón í vegi þess að uppræta langvarandi spillingu í Úkraínu.

Sjá einnig: Repúblikanar vildu einnig láta reka saksóknarann úkraínska

Hin rannsóknin tengist samsæriskenningu um tölvupóstþjón landsnefndar Demókrataflokksins sem rússneskir hakkarar brutust inn í fyrir forsetakosningarnar 2016 og láku vandræðalegum póstum í gegnum Wikileaks. Trump hefur lengi verið gramur vegna niðurstöðu bandarísku leyniþjónustunnar að rússnesk stjórnvöld hafi háð upplýsingastríð og framið tölvuinnbrot til að hjálpa honum til sigurs.

Trump og bandamenn hans hafa því haldið þeirri hugmynd á lofti um að það hafi í reynd verið úkraínskir útsendarar sem frömdu innbrotið í tölvupóstþjón demókrata og að þeir hafi bókstaflega falið áþreifanlegan tölvupóstþjón í Úkraínu. Markmiðið hafi verið að koma sök á Rússa. Það er, eins og áður hefur komið fram, þvert á öll sönnunargögn og niðurstöður öryggisstofnanna í bandaríkjunum og sérfræðinga.

Þessu hafa Trump-liðar og þar með taldir nokkrir þingmenn, haldið áfram að dreifa. Þrátt fyrir að embættismenn og forsvarsmenn öryggisstofnanna hafi varað þá við því að ásakanirnar gegn Úkraínu séu runnar undan rifjum þeirra sömu Rússa og gerðu árásina á tölvukerfi Landsnefndar Demókrataflokksins.