Erlent

Ráðgjafi Epstein og saksóknari gegn Clinton í lögfræðiteymi Trump

Kjartan Kjartansson skrifar
Á meðal fyrri skjólstæðinga Dershowitz eru Jeffrey Epstein og OJ Simpson.
Á meðal fyrri skjólstæðinga Dershowitz eru Jeffrey Epstein og OJ Simpson. AP/Richard Drew

Kenneth Starr, sérstaki saksóknarinn sem rannsakaði Bill Clinton á sínum tíma, og Alan Dershowitz, lagaprófessor sem var ráðgjafi Jeffrey Epstein, verða í lögfræðiteymi Donalds Trump Bandaríkjaforseta fyrir réttarhöld Bandaríkjaþings yfir honum vegna meintra embættisbrota.

Búist er við því að réttarhöld öldungadeildarinnar hefjist á þriðjudag. AP-fréttastofan sagði fyrst frá því að Starr og Dershowitz tækju þátt í að verja Trump fyrir kæru um að hann hafi misnotað vald sitt og hindrað rannsókn þingsins á því. Dershowitz staðfesti síðar á Twitter að hann væri hluti af lögfræðiteyminu.

Starr var sérstakur saksóknari sem var í upphafi falið að rannsaka fasteignaviðskipti Bills Clinton, þáverandi Bandaríkjaforseta, í svonefndu Whitewater-máli á 10. áratugnum. Sú rannsókn leiddi ekki til neins en saksóknarar Starr grófu í leiðinni upp að Clinton hefði logið um kynferðislegt samband sem hann átti í við Monicu Lewinsky, starfsnema í Hvíta húsinu.

Fulltrúadeild Bandaríkjaþings, sem repúblikanar stýrðu þá, kærðu Clinton fyrir embættisbrot á grundvelli skýrslu Starr um rannsóknina en forsetinn var sýknaður í öldungadeildinni þar sem demókratar fóru með meirihluta.

Rannsókn Starr þótti umdeild á sínum tíma. Hún stóð yfir um fjögurra ára skeið og beindist í lokin að allt öðrum hlutum en Starr var upphaflega falið að rannsaka.

Lewinsky brást við ráðningu Starr á Twitter í dag. „[Þ]etta er sannarlega „ertu að gera fjandans at í mér?“ dagur í dag,“ tísti hún.



Átti þátt í samkomulagi Epstein við saksóknara

Dershowitz er heiðursprófessor við Harvard-háskóla sem tók meðal annars þátt í málsvörn O.J. Simpson. Í tísti sem hann sendi frá sér sagðist hann hafa verið á móti kærunni gegn Clinton fyrir embættisbrot og að hann hefði kosið Hillary Clinton. Hann muni taka þátt í munnlegum málflutningi við réttarhöldin í öldungadeildinni.

Í seinni tíð hefur Dershowitz verið þekktur fyrir að koma Trump forseta til varnar á Fox-sjónvarpsstöðinni. Hann hefur einnig verið bendlaður við mál Jeffrey Epstein, kaupsýslumannsins sem var ákærður fyrir mansal og kynferðislega misnotkun á ungum stúlkum. Epstein svipti sig lífi í fangelsi í fyrra.

Dershowitz var lögfræðilegur ráðgjafi Epstein og átti þátt í umdeildu samkomulagi sem saksóknarar á Flórída gerðu við kaupsýslumanninn sem kom honum undan fangelsisvist fyrir rúmum áratug. Alexander Acosta, sem var ríkissaksóknari á Flórída á þeim tíma, sagði af sér sem atvinnumálaráðherra Trump vegna málsins í fyrra.

Fréttavefurinn Axios hafði eftir Dershowitz í desember árið 2018 að hann hefði þegið nudd frá konu á heimili Epstein á Flórída. Hann fullyrðir þó að stúlkan hafi verið yfir lögaldri. Ein þeirra kvenna sem sakaði Epstein um misnotkun hélt því fram að Dershowitz hefði misnotað hana þegar hún var undir lögaldri. Hann hefur þverneitað því.

Óljóst er hver málsrök verjenda Trump verða fyrir öldungadeildinni. Frá því að Úkraínuhneykslið sem Trump var á endanum kærður fyrir kom upp hefur hvorki Hvíta húsið né lögfræðingar forsetans gefið út eigin lýsingu á þeim atburðum sem málið varðar. Hvíta húsið hefur nær alfarið lagt af fréttamannafundi og hafnaði því að senda fulltrúa til að taka þátt í rannsókn fulltrúadeildarinnar á meintum brotum Trump. Þess í stað hafa þeir gagnrýnt formsatriði í meðferð þingsins.

Kenneth Starr stýrði rannsókn á Bill Clinton sem stóð yfir í um fjögur ár. AP/Lauren Victoria Burke

Tengdar fréttir

Brutu lög með frystingu neyðaraðstoðar til Úkraínu

Sjálfstæð eftirlitsstofnun með framkvæmdavaldi Bandaríkjanna hefur komist að þeirri niðurstöðu að Hvíta húsið hafi brotið lög þegar neyðaraðstoð til Úkraínu, sem þingið hafði samþykkt, var fryst.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.