Fyrsta kórónusmitið sagt staðfest á Suðurlandi

Fyrsta tilfelli kórónuveirunnar hefur verið staðfest á Suðurlandi. Umdæmislæknir sóttvarna segir að karlmaður sem er smitaður sé í heimaeinangrun í sumarbústað í uppsveitum Árnessýslu og fjórir einstaklingar sem tengist honum séu í sóttkví.

Sunnlenska hefur eftir Hirti Kristjánssyni, sóttvarnalækni í suðurumdæmi, að fólkið hafi verið í skíðaferðalagi erlendis eins og allir aðrir sem hafa greinst með kórónuveiruna hér á landi.

Alls segja heilbrigðisyfirvöld að 34 séu nú smitaðir af kórónuveirunni sem veldur COVID-19-sjúkdómnum á Íslandi. Ekki er skýrt hvort að tilfellið á Suðurlandi sé inni í þeirri tölu. Smitin hafa verið rakin til ferðalaga Íslendinga á Ítalíu og í Austurríki.

Ekki náðist í Hjört strax við vinnslu þessarar fréttar.