Sólveig Anna: Ætlum að mála bæinn rauðan

„Ég byrja föstudaginn minn í vinnunni en eftir vinnu ætla ég að skella mér á tónleika með Grísalappalísu. Tónleikarnir eru í 12 tónum á Skólavörðustígnum,“ segir Sólveig Anna Aradóttir, organisti og söngkona hljómsveitarinnar Útidúrs.

Grísalappalísa spilar í 12 tónum í kvöld kl. 18 en hljómsveitin gaf nýverið út plötuna Ali og hefur platan hlotið mikið lof. „Þetta er klárlega besta íslenska hljómsveitin í dag. Hópur hæfileikaríkra stráka sem eru alveg frábærir „live“,“ segir Sólveig sem kveðst hlakka mikið til. „Við vinkonurnar eigum eflaust eftir að dansa alveg helling. Við ætlum að mála bæinn rauðan og það er vonandi að við dettum á séns,“ segir Sólveig Anna eldhress, en hún starfar einnig sem þjónn á 10 dropum.