Stóðst ekki mátið

"Við höfum fengið alveg ótrúlega góðar viðtökur, betri og meiri en við þorðum nokkurn tímann að vona," segir Jóel Briem, nýr verslunarstjóri Spútnik. Verslunin flutti á dögunum af Laugaveginum á Klapparstíginn í nokkuð stærra húsnæði. Nýja húsnæðið hýsti lengi vel verslunina Fífu og segir Jóel rýmið henta miklu betur en það gamla á Laugaveginum. "Hér erum við með allt á einni hæð sem gerir þetta miklu skemmtilegra." Það er nóg framundan hjá Spútnikliðinu og segir Jóel mikið af flottum sendingum væntanlegar í búðina. "Við erum að fá gömlu góðu Levis-buxurnar aftur en þær hafa ekki verið fáanlegar undanfarin ár. Stígvél og kjólar verða síðan fyrir dömurnar, kúrekastígvél, Adidas-peysur og ótal margt fleira." Aðspurður segir Jóel second hand tískuna alls ekki á útleið. "Vinsældirnar eru að aukast ef eitthvað er. Þetta eru líka svo sígild föt sem maður getur ekki hætt að nota." Jóel var áður verslunarstjóri í úra- og skartgripabúð í Kringlunni en stóðst ekki mátið þegar Spútnik kallaði. "Ég var hér fyrir tveimur árum og það er gott að vera kominn aftur. Klapparstígurinn er líka bara málið í dag. Gel er væntanlegt á hornið, Sirkus er fyrir ofan, Aðalvídeóleigan og fleiri rótgrónir staðir." Verslunin á Laugaveginum verður opin fram að mánaðarmótum að sögn Jóels. "Það er útsala í gangi í tvær vikur í viðbót en ætli það opni ekki enn einn veitingastaður eða hótel þegar henni er lokið."