Garðar aftur markahæstur í Svíþjóð

Garðar Gunnlaugsson skoraði tvö mörk í 4-0 sigri Norrköping á Örgryte í gær og varð þar með aftur markahæsti leikmaður sænsku 1. deildarinnar.

Þar með tók hann fram úr Johan Patriksson, leikmanni Sundsvall, sem hefur skorað sextán mörk á tímabilinu en Garðar sautján.

„Það er mér mikilvægt að verða markahæsti leikmaður deildarinnar. Slíkt skiptir alla framherja máli," sagði Garðar í samtali við Folkbladet í Norrköping.

Liðið hefur þegar tryggt sér meistaratitilinn í deildinni sem og sæti í úrvalsdeildinni að ári. Tvær umferðir eru eftir og á Norrköping eftir að mæta Jönköping og Degerfors.

„Ég held að eitt mark í viðbót ætti að gulltryggja þetta."