Kirkjugarðarnir þyrftu að hækka einingaverð um fjörutíu prósent

„Núverandi ástand í kirkjugörðum er algjörlega óviðunandi vegna niðurskurðar. Kirkjugarðarnir þyrftu að hækka einingaverð um fjörutíu prósent til að vera á línu við núverandi gjaldlíkan frá 2005.“ Þetta segir Þórsteinn Ragnarsson, formaður stjórnar Kirkjugarðasambands Íslands.

Vonir standa til að framlög ríkisins verði aukin eftir fund milli stjórnar Kirkjugarðasambands Íslands og stjórnvalda þann 2. maí. Árlega er losaður milljarður til rekstrar kirkjugarða landsins.

„Frá 2009 til yfirstandandi árs hefur framlag ríkisins verið skert miðað við núverandi gjaldlíkan. Við tókum að okkur skerðingar í efnahagshruninu, en skerðingarnar hafa verið meiri en áformað var,“ segir Þórsteinn. „Kirkjugarðar hafa ekki lengur rekstrarfé til að greiða fyrir grafartöku og umhirðu.“

Þessu til viðbótar hefur þóknun til presta fyrir útfarir hækkað undanfarin tvö ár um sjötíu prósent. Umframkostnaður vegna þessara hækkana nema á árunum 2014 til 2016 að lágmarki um sextíu milljónum króna.

Kirkjugarðar Reykjavíkurprófastsdæma (KGRP), sem þjóna rúmlega fimmtíu prósent af þjóðinni, hafa verið reknir með halla fjögur af síðustu fimm rekstrarárum. Niðurstaða rekstrarreiknings 2015 sýnir að gjöld KGRP eru um 30 milljónir króna umfram tekjur. Niðurstaðan á landsbyggðinni er ekki betri að sögn Þórsteins.

Þórsteinn segir að síðustu tvö ár hafi áheyrn ríkisyfirvalda ekki náðst um þessi mál. Nú sé áætlaður fundur þann 2. maí og þar verður óskað eftir að samkomulagið frá 2005 verði endurnýjað og einingaverðið uppfært til verðlags 2017.

Óskað var eftir viðbragða Innanríkisráðherra en þau svör fengust að ráðherra gæti ekki tjáð sig um málið á meðan nefnd væri að störfum að skoða þessi fjárhagslegu samskipti. 

Fréttin birtist fyrst í Fréttablaðinu 22. apríl