Hundruð brunnu inni í fangelsinu

Meira en þrjú hundruð manns létu lífið í eldsvoða í fangelsi í Hondúras í gær. Tugir brunnu inni meðan slökkvilið var að leita að lyklum. Fimm hundruð fangar sluppu. Ævareiðir aðstandendur heimta svör.

Heyra mátti skelfingar- og kvalaóp frá fjölda fanga sem sátu innilokaðir í klefum sínum meðan fangelsið í borginni Comayagua í Hondúras brann í gær.

Talið er að rúmlega 350 fangar hafi brunnið inni. Tugir þeirra brunnu inni eða köfnuðu af reyk vegna þess að slökkviliðsmenn fundu ekki lykla klefanna fyrr en of seint.

„Við gátum ekki komið þeim út vegna þess að við vorum ekki með lyklana og fundum ekki fangaverðina sem voru með þá,“ sagði Josue Garcia, talsmaður slökkviliðsins í Comayagua.

Tugir manna særðust en óttast er að 475 fangar hafi sloppið út í ringulreiðinni sem varð. Óeirðir brutust út meðal fanganna þegar eldsins varð vart.

Einn fanganna, Silverio Aguilar, sagði í útvarpsviðtali að einhver hafi byrjað að hrópa: Eldur! Fangarnir hafi hrópað á hjálp en lengi vel brást enginn við.

„Um stund heyrði enginn neitt, en eftir nokkrar mínútur, sem virtust vera heil eilífð, kom vörður með lykla og hleypti okkur út.“

Ævareiðir aðstandendur margra fanganna kröfðust þess að komast inn um hlið fangelsisins og fá afhent brunnin lík ættingja sinna og ástvina. Sumir reyndu að brjóta sér leið inn í fangelsið.

„Við viljum fá að sjá líkið,“ sagði Juan Martinez, faðir eins fanganna sem sagðir voru hafa dáið. „Við verðum hér þangað til við fáum það.“

Hundruð aðstandenda fóru einnig á sjúkrahúsið í Comayagua, en þangað höfðu margir hinna særðu verið fluttir. Sumir voru einnig fluttir á sjúkrahús í höfuðborginni Tegucigalpa.

Sumir hinna særðu eru lífshættulega meiddir, þannig að tala látinna gæti enn átt eftir að hækka nokkuð.

Óljóst var um upptök eldsins í gær. Tvennt þótti helst koma til greina: Annað hvort var þetta íkveikja eða kviknað hefur í út frá rafmagni.

Lucy Marder, yfirmaður réttarmeinadeildar ríkissaksóknara, sagði að erfitt yrði að bera kennsl á fjölmarga fanga því lík þeirra væru svo illa brunnin.

Allt að þrír mánuðir geti liðið áður en tekist hefur að bera kennsl á alla með erfðaefnisrannsóknum.

gudsteinn@frettabladid.is