Þegar geimverurnar komu á Snæfellsnes

Félagaranir og leikararnir Kári Viðarsson og Víkingur Kristjánsson hafa verið með geimverur og fljúgandi furðuhluti á heilanum síðustu vikur, en þeir sýna um þessar mundir leikritið samsögulega 21.07 þar sem fjöldi fólks lagði leið sína á Snæfellsnes til að verða vitni að heimsókn utan úr geimnum.

Ísland í dag fjallaði um málið í kvöld og Hugrún Halldórsdóttir fór vestur á Snæfellsnes þar sem hún ræddi við þá félaga. Hægt er að horfa á innslagið í spilaranum hér að ofan.

Ómar Lúðvíksson, Oddviti Neshrepps, sagði  á sínum tíma í viðtali við Ómar Ragnarson að sér hefði verið falið umboð til að ávarpa geimverurnar.

„Við verðum að taka þetta alvarlega eins og margt annað, þess vegna var mér falið að taka á móti þeim með pompi og pragt. Ef þeir skilja ekki okkar íslensku tölum við bara fingramál. Við vonum bara að þær komi," sagði hann meðal annars í viðtalinu.

Leikararnir muna vel eftir atburðunum. Þá hafa fjölmargir haft samband við þá eftir að hafa frétt af leikritinu og deilt sínum minningum um geimverurnar á Snæfellsnesi, en í sýningunni er slíkum sögum fléttað saman.

„Mín uppáhaldssaga er til dæmis sagan af hinni áströlsku Susan, en hún kom sérstaklega til Íslands vegna þess að hún vildi flytja út í geim. Í heimalandi hennar hafði hún verið send á geðdeild, en hún var fullviss um að hún væri geimvera," segir Kári.

Þeir félagar segja forvitnilegt að hugsa til þess hvernig atburðirnir hefðu undið upp á sig í dag. „Maður veltir því fyrir sér hvað hefði getað gerst 20 árum síðar, þegar Facebook og samskiptamiðlarnir eru komnir til sögunnar. Þetta var mjög stórt dæmi á sínum tíma og fjölmiðlar komu frá öllum heimshornum. Það voru svona 500 manns sem komu hingað til að freista þess að sjá verurnar en við reiknuðum gróflega út að í dag gætu það auðveldlega hafa verið 20 þúsund manns.“

Myndskeiðið hér að ofan er stórskemmtilegt, en þar bregður fyrir ósviknum upptökum sem teknar voru í kringum atburðina árið 1993.