Efla nám og rannsóknir á sviði endurnýjanlegra orkugjafa

Landsvirkjun hefur samið við Háskóla Íslands og Háskólann í Reykjavík um að efla nám og rannsóknir á sviði endurnýjanlegra orkugjafa. Með samstarfinu á að skapa sameiginlegt virði fyrir Landsvirkjun, háskólana og íslenskt samfélag með stuðningi við þau fræðisvið sem þörf er á námi og rannsóknum.

Samstarfssamningurinn er til næstu fimm ára og mun Landsvirkjun styðja háskólana um 80 milljónir króna, sem skiptist jafnt á milli skólanna.

Athöfnin fór fram í höfuðstöðvum Landsvirkjunar í gær þar sem skrifað var undir samninginn. Þar sagði Kristín Ingólfsdóttir rektor Háskóla Íslands að lögð yrði áhersla á að efla kennslu og rannsóknir á sviði jarðefnafræði þar sem skortir þekkingu á því sviði, þá helst á áhrifum og getu jarðvarmavirkjanna.

Ari Kristinn Jónsson rektor Háskólans í Reykjavík benti á að með samstarfinu sé verið að ýta undir góða nýtingu náttúruauðlinda sem og að virkja mannauð og hugvit á sviði orkumála.

Í fréttatilkynnigu sem Landsvirkjun sendi frá sér kemur fram að samstarfssamnignurinn styðji við gildandi stefnu Landsvirkjunar um samfélagslega ábyrgð sem, meðal annars, segir að skapa eigi sameiginlegt virði fyrir atvinnulíf og samfélag með því að deila þekkingu og stuðla að nýsköpun og þróun á endurnýjanlegum orkugjöfum.

Hörður Arnarson forstjóri Landsvirkjunar segir að öflugra samstarf Landsvirkjunnar við háskólana stuðli að því markmiði.