Ganga ekki hart á eftir skýringum foreldra

Miðlæg skrá um bólusetningar á Íslandi inniheldur ekki upplýsingar um ástæðu þess ef ekki er bólusett, en það er skylt samkvæmt 9. grein reglugerðar um bólusetningar. Samkvæmt sóttvarnalögum er sóttvarnalæknir ábyrgur fyrir því að haldin sé smitsjúkdómaskrá þar sem þessar upplýsingar koma fram.

Þórólfur Guðnason, yfirlæknir sóttvarna hjá Landlæknisembættinu, sagði skrá yfir þá sem ekki vilja láta bólusetja börnin sín ekki vera til.

„Meiningin er að það sé skráð en við búum ekki til sérstaka skrá. Við erum ekki að ganga hart á eftir fólki með þetta, að gefa ástæður fyrir því að það sé ekki bólusett,“ segir Haraldur Briem sóttvarnalæknir, spurður að því af hverju þessum reglum sé ekki fylgt.

Hann segir að yfirgnæfandi fjöldi barna sé bólusettur eftir fæðingu, eða 97 prósent. Þetta þýðir að um 2-3 prósent foreldra vilji ekki láta bólusetja börnin sín. Haraldur segir þetta ekki hafa færst í aukana en að þetta sé hávær hópur.

Ástæður þessa hóps fyrir því að neita að láta bólusetja börnin sín liggja ekki fyrir þrátt fyrir að það sé skylt með lögum.