Eldfimt ástand í Egyptalandi

Bæði mótmælendur og stuðningsmenn forsetans, Mohammed Morsi, streymdu til höfuðborgarinnar Kaíró í dag, en herinn gaf forsetanum í gær tveggja sólarhringa frest til þess að leysa stjórnmálakreppuna í landinu og verða við kröfum mótmælenda um afsögn. „Lokaviðvörun heraflans til Morsi“ var fyrirsögn á dagblaði sem borgarbúar í Kaíró lásu í dag og eftir yfirlýsingu hersins tóku egypsk hlutabréf að falla. Mótmælendur sátu sem fastast á Tahrir torginu í dag og fögnuðu þegar þyrlur hersins sveimuðu yfir mannfjöldanum, sem álítur herinn á sínu bandi.

Sex ráðherrar hafa sagt af sér en Morsi hafnaði í morgun kröfum um að hann stigi af stóli. Talsmenn stjórnarandstöðunnar segjast ekki styðja hugsanlega valdatöku hersins en hóta þó aðgerðum, muni Morsi ekki segja af sér í dag. 17 eru fallnir og um 800 særðir eftir átökin í landinu undanfarna daga.