Íslenskt lag í So You Think You Can Dance

Lagið „Old Skin“ með Ólafi Arnalds og Arnóri Dan verður flutt í dansþættinum So You Think You Can Dance í Kaliforníu í nótt. Danshöfundurinn Stacey Tookey valdi lagið og semur dansinn við það.

Arnór Dan var Ólafi innan handar við gerð nýjustu plötu hans, For Now I Am Winter, og saman sömdu þeir lagið Old Skin.

„Þetta er bara alveg rosalega spennandi og magnað að vita af því að svona margir séu að fara að hlusta á lagið,“ segir söngvarinn Arnór Dan í samtali við Vísi. Þátturinn nýtur mikill vinsælda um heim allan og búast má við að milljónir manns fylgist með honum í nótt.

„Það er soldið síðan skipuleggjendur keppninnar höfðu samband við Óla útaf þessu, en þau hafa áður notað lag eftir hann í þáttunum.  Tónlistin hans er mjög dansvæn, en það er auðvitað ekkert smá mikill heiður og sjúklega skemmtilegt að fá að vera hluti af svona stóru dæmi," segir Arnór sem er hinn rólegasti yfir þessu öllu saman. „Ég er eiginlega ekki alveg búinn að átta mig á þessu, það kemur örugglega yfir mig á morgun þegar ég verð búinn að sjá þetta.“