Valdið verði áfram hjá sjóðfélögum Frjálsa

Frjálsi lífeyrissjóðurinn gengur í gegnum breytingar um þessar mundir. Stjórn sjóðsins hefur unnið samstiga að þeim umbótum sem aðalfundur samþykkti á síðastliðnu ári. Nú bregður svo við að einn stjórnarmanna, Halldór Friðrik Þorsteinsson (HFÞ), endurvekur þá tillögu, sem hafnað var á aðalfundinum, að valdið til þess að ákveða meiriháttar breytingar er varða rekstrarfyrirkomulag Frjálsa, verði tekið af sjóðfélögum og alfarið fært í hendur stjórnar.

Í grein sem birtist í Fréttablaðinu 9. maí sl. segir HFÞ: „Með því að kjósa fólk sem vill frjálsan lífeyrissjóð hafa sjóðfélagar bein áhrif á fyrirkomulag sjóðsins og þar með vænta framtíðarávöxtun lífeyrissparnaðar síns“.

Hér er hlutunum snúið á hvolf. Verði breytingartillaga HFÞ samþykkt á ársfundi Frjálsa 13. maí nk. munu sjóðfélagar einmitt ekki hafa bein áhrif á fyrirkomulag sjóðsins. Stjórn sjóðsins mun verða einráð um rekstrarfyrirkomulag, samkvæmt tillögu HFÞ, án þess að þurfa að bera meiriháttar breytingar undir sjóðfélaga til ákvörðunar.

Á ársfundinum leggur stjórn sjóðsins til að samþykktum hans verði breytt á þann veg að nafn Arion banka verði tekið út sem rekstraraðila sjóðsins. Í stað þess verði stjórn veitt heimild til þess að gera rekstrarsamning við fjármálafyrirtæki eða annan hæfan aðila um daglegan rekstur sjóðsins. Það er mikilvægt ákvæði í breytingartillögu stjórnar, að hyggist hún gera breytingar á rekstrarfyrirkomulagi sjóðsins eða vali á rekstraraðila, skuli slík tillaga vera borin undir sjóðfélaga og hljóta samþykki a.m.k. 2/3 hluta greiddra atkvæða, líkt og gildir um breytingar á samþykktum almennt. Tillagan er í samræmi við ályktun, sem samþykkt var á síðasta ársfundi sjóðsins. Verði hún samþykkt stuðlar hún að sjóðfélagalýðræði og gerir það engum vafa undirorpið að sjóðurinn hefur fullt frelsi um fyrirkomulag á rekstri sínum.

Frjálsi lífeyrissjóðurinn hefur frá stofnun útvistað rekstri og eignastýringu til fjármálafyrirtækis. Nýlega var framkvæmdastjóri sjóðsins gerður að starfsmanni hans og er hann fyrsti starfsmaður sjóðsins frá upphafi. Ákveðið hefur verið að innri endurskoðun sjóðsins verður flutt frá rekstraraðilanum, Arion banka, til endurskoðunarfélags. Að loknum ársfundi sjóðsins nk. mánudag, verða allir stjórnarmenn hans kosnir af sjóðfélögum í samræmi við ákvörðun sjóðfélaga í fyrra. Lýkur þá skipun Arion banka á minnihluta stjórnar.

Allar ofangreindar breytingar miða að því að skerpa á sjálfstæði sjóðsins og minnka orðsporsáhættu sem útvistunin á rekstri hans felur í sér. HFÞ hefur ásamt öðrum stjórnarmönnum unnið vel að þessum breytingum nema hvað varðar hugmyndir hans um alræði stjórnar um rekstrarfyrirkomulag.

Ásdís Eva Hannesdóttir formaður

Magnús Pálmi Skúlason varaformaður