Pepsi Max-mörkin: Það er stuttur þráðurinn í Elfari Frey

Blikinn Elfar Freyr Helgason hefur verið að leika sér að eldinum í sumar og í annað sinn mátti hann teljast heppinn að vera ekki rekinn af velli.

Elfar Freyr sýndi af sér sérkennilega hegðun í leiknum gegn HK á dögunum er hann sparkaði í afturenda fyrirliða HK. Þá slapp hann með skrekkinn og hann gerði slíkt hið sama gegn KA.

„Elfar er frábær leikmaður en það hefur verið svolítið stuttur í honum þráðurinn,“ sagði Þorkell Máni Pétursson, einn sérfræðingur Pepsi Max-markanna.

Er Elfar Freyr fékk loksins gult spjald í leiknum þá bað hann um skiptingu.

„Ég hef heyrt það á skotspónum úr Kópavogi að þegar Elfar Freyr finnur að hann er að missa stjórn á sjálfum sér þá vill hann fá skiptingu. Ég sel það ekki dýrara en ég keypti það,“ sagði Logi Ólafsson.

Sjá má uppátæki Elfars og umræðuna hér að neðan.