Aukið vægi sjóðfélaga Frjálsa lífeyrissjóðsins

Aðild að Frjálsa lífeyrissjóðnum er eins og nafn sjóðsins bendir til, frjálst val sjóðfélaga. Mikill sveigjanleiki er líka í aðild þar sem sjóðfélagar hafa mikið val um það hversu mikill hluti skyldusparnaðar fer í séreign. Þannig getur erfanleg séreign skylduiðgjalda orðið allt að 78% eftir því hvaða leið sjóðfélaginn velur. Sjóðfélagi hefur líka mikinn sveiganleika þegar kemur að útgreiðslu. Sjóðfélagar Frjálsa hafa þannig mun meira valfrelsi en gengur og gerist í öðrum lífeyrissjóðum á Íslandi.

Góð ávöxtun – traust sjóðfélaga

Ávöxtun sjóðsins síðustu 12 mánuði hefur verið góð. Þannig er ávöxtun Frjálsa 1 sem lang flestir sjóðfélagar hafa valið um 14,1%. Mikilvægast er þó að vel takist til við langtímaávöxtun enda fara lífeyrissjóðir með ævisparnað einstaklinga. Síðastliðin 15 ár hefur ávöxtun leiða sjóðsins verið 8,4 til 8,7%, en raunáxöxtun verið 3,5 til 3,8%. Sjóðfélagar Frjálsa eru um 60 þúsund að tölu og hefur sjóðurinn um 267 milljarða eignir til ávöxtunar. Sjóðurinn hefur vaxið hlutfallslega talsvert meira en lífeyrissjóðskerfið í heild, mörg undanfarin ár, sem sýnir kannski best traust sjóðfélaga á sjóðnum.

Nánari upplýsingar um ávöxtun til lengri og skemmri tíma má skoða á vef sjóðsins.

Aukið sjálfstæði

Frjálsi lífeyrissjóðurinn hefur frá upphafi útvistað nánast allri starfsemi sinni til eins rekstraraðila hverju sinni. Breyting hefur nú þegar verið gerð á því fyrirkomulagi þannig að framkvæmdastjóri sjóðsins er nú ráðinn af stjórn sjóðsins og er því óháður rekstraraðila. Ákveðið hefur verið að Innri endurskoðun sjóðsins verði jafnframt í höndum annars óháðs aðila, en rekstraraðili hefur hingað til haft innri endurskoðun sjóðsins með höndum. Þetta eru breytingar sem stjórn sjóðsins er sammála um að auki skilvirkni í stjórnun og eftirliti með starfsemi sjóðsins.

Sjóðfélagarnir ráða för

Frjálsi lífeyrissjóðurinn hefur ekki alltaf haft rekstrarsamning við sama rekstraraðilann, en sjóðurinn er núna með rekstrarsamning við Arion banka. Það er hinsvegar mikilvægt að hafa í huga að sjóðfélagar geti tekið um það ákvörðun hvaða rekstraraðila samið er við. Þess vegna er það hluti af þeirri breytingartillögu við samþykktir sem stjórn leggur fyrir ársfund að slíka breytingu þurfi að bera undir sjóðfélaga. Tillagan þarf þá að hljóta 2/3 hluta greiddra atkvæða til að hljóta samþykki, líkt og gildir um samþykktarbreytingar almennt. Þetta er mikilvægt atriði til að skapa festu í rekstri sjóðsins, en tryggja á sama tíma að rekstraraðili leggi sig fram um að ná sem bestum árangri í rekstri og ávöxtun eigna sjóðsins. Það hlýtur að vera afar mikilvægt að ákvörðun um svo veigamiklar breytingar sem útvistun á rekstri sjóðsins er, séu teknar í samráði við sjóðfélaga fremur en með einföldum meirihluta stjórnar.

Rekstraraðili mun ekki skipa neinn stjórnarmann frá og með ársfundi á morgun, en þá verður kosið um þá 5 stjórnarmenn af 7 sem ekki var kosið um á síðasta ársfundi. Undirritaður gefur kost á sér til áframhaldandi setu í stjórn til næstu þriggja ára.

Vonandi sjá sem flestir sér fært að mæta á ársfundinn, sem haldinn verður í aðalfundarsal Arion banka að Borgartúni 19, mánudaginn 13. maí kl. 17:15.

Höfundur er í stjórn Frjálsa lífeyrissjóðsins og gefur kost á sér til stjórnarkjörs.