Archie í aðal­hlut­verki í fyrsta jóla­korti fjöl­skyldunnar

Hertogahjónin af Sussex sendu frá sér jólakveðju nú á dögunum en þetta er þeirra fyrsta jólakveðja eftir að sonur þeirra Archie kom í heiminn í maí. Archie litli er því skiljanlega í ákveðnu aðalhlutverki á myndinni.

Jólakort fjölskyldunnar var birt á Twitter-síðu styrktarsamtanna The Queen‘s Commonwealth Trust sem þau hjónin eru í forsvari fyrir. Samtökin vinna að því að efla unga leiðtoga til þess að breyta heiminum.

Hjónin eyða nú jólunum í Kanada og munu því ekki taka þátt í hefðbundnum hátíðarhöldum konungsfjölskyldunnar í ár.

Á jólakortinu óska þau öllum gleðilegra jóla og farsældar á komandi ári frá litlu fjölskyldunni. Archie er þar fyrir miðju á meðan foreldrarnir horfa stoltir á hann í bakgrunni.