Erlent

Milljón manns sögð hafa mót­mælt í Kólumbíu

Atli Ísleifsson skrifar
Frá mótmælum í höfuðborginni Bogotá í gær.
Frá mótmælum í höfuðborginni Bogotá í gær. AP

Rúmlega milljón manns eru sögð hafa tekið þátt í mótmælaaðgerðum víðs vegar um Kólumbíu í gær. Mótmæli fóru fram í fjölda borga, meðal annars höfuðborginni Bogotá, Medellín í norðvesturhluta landsins og Cali í suðvesturhluta landsins.

Mótmælendurnir beina reiði sinni að umbótatillögum stjórnar landsins í efnahagsmálum og almenna óánægju í garð ríkisstjórnar Iván Duque Márquez forseta.

Talsmenn stofnana og hreyfinga sem stóðu að mótmælaaðgerðunum segja að á aðra milljón manna hafi tekið þátt í aðgerðunum. Segja þeir gærdaginn hafa verið sögulegan og sigur fyrir landið. Um leið hafa þeir hvatt til þess að þeir fái fund með forsetanum til að ræða kröfugerð þeirra.

„Kólumbíumenn hafa talað í dag. Við heyrum í þeim. Samfélagsviðræður hafa verið eitt meginstef þessarar ríkisstjórnar og við þurfum að dýpka hana í öllum geirum samfélagsins,“ sagði Duque án þess þó að svara því til hvort til standi að eiga beinar viðræður við skipuleggjendur mótmælanna.

Til óeirða kom á fjölda staða og var herinn víða kallaður út. Þannig var hópur grímuklæddra mótmælanda sem kastaði steinum og öðru lauslegu í átt að lögreglu í Bogotá. Beitti lögregla táragasi gegn mótmælendunum.

Talsmenn yfirvalda segja að 42 mótmælendur og 37 lögreglumenn hafi slasast í mótmælunum. Þá hafi 37 verið handteknir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.