Regína Ósk æfir með sigurvegaranum

Skemmtiþátturinn Allir geta dansað hefur göngu sína á Stöð 2 á nýjan leik þann 29. nóvember. Tíu pör taka þátt og stendur eitt par eftir sem sigurvegari í lok janúar á næsta ári. Næstu daga verða öll pörin í Allir geta dansað kynnt til leiks og er komið að því að kynna dansparið sem Regína Ósk og Max Petrov skipa.

Regína Ósk hefur í áraraðir verið ein ástsælasta söngkona landsins eða alveg frá því að hún tók þátt í Eurovision ásamt Friðriki Ómari.

„Held ég sé ágæt í hreyfingum en hef aldrei snert samkvæmisdansa. Ég hef farið á nokkur dansnámskeið í gegnum tíðina t.d. magadans og Bollywood og elska að dansa,“ sagði Regína á sínum tíma í samtali við Vísi.

Max Petrov þekkir keppnina mjög vel en hann fór alla leið á fyrstu þáttaröðinni af Allir geta dansað og vann keppnina ásamt Jóhönnu Guðrúnu .

Dómarar í ár verða þeir sömu og í fyrstu seríunni:

• Selma Björnsdóttir

• Karen Reeve

• Jóhann Gunnar Arnarson

Vilhelm Gunnarsson ljósmyndari Vísis leit við á æfingu hjá Regínu og Max í vikunni og fangaði stemninguna hjá dansparinu.