Innlent

Mikið framboð hér á kókaíni

Ari Brynjólfsson skrifar
Lögregla hefur lagt hald á rúm 30 kíló af kókaíni á árinu.
Lögregla hefur lagt hald á rúm 30 kíló af kókaíni á árinu. Fréttablaðið/Anton

Verð á kókaíni hefur lækkað frá 2017 og innlögnum á Vog vegna kókaínfíknar fjölgað. Læknir á Vogi segir mikið framboð þýða að fleiri prófi. Formaður Flokks fólksins segir kókaín nú sterkara efni en áður.

„Efnið er miklu sterkara en það sem við höfum áður þekkt og þó það sé búið að haldleggja hátt í 40 kíló þá hækkar ekki verðið sem segir okkur að það sé nóg framboð,“ segir Inga Sæland, formaður Flokks fólksins. Hún var málshefjandi í sérstökum umræðum á þingi í gær um fíkniefnafaraldur á Íslandi, til andsvara var Svandís Svavarsdóttir heilbrigðisráðherra.

Alls hefur verið lagt hald á þrjátíu kíló af kókaíni við innflutning til landsins það sem af er árinu. Er um að ræða gríðarlega aukningu frá því sem áður var.

Arnþór Jónsson, formaður SÁÁ.

Verð á kókaíni hefur lækkað nokkuð frá árslokum 2017 til dagsins í dag samkvæmt tölum SÁÁ. Einnig hefur verð á öðrum fíkniefnum lækkað en ekki jafn skarpt og á kókaíni. Til dæmis lækkaði verð á e-?töflu úr 2.000 krónum í 1.400 krónur á sama tíma og verð á grammi af kókaíni fór úr 18.000 krónum niður í 13.700 krónur. Grammið af amfetamíni fór þá úr 3.900 niður í 3.200 krónur og verð á grammi af marijúana stendur nánast í stað í 2.700 krónum.

Fram kom í máli Svandísar að fjöldi sjúklinga sem leita á Vog vegna amfetamínnotkunar hafi haldist stöðugur á síðustu árum. „Hins vegar hefur innlögnum vegna kókaínfíknar fjölgað og árið 2018 var 51 prósent af innlögnum tilkomið vegna örvandi vímuefnafíknar.“

Víðir Sigrúnarson, læknir á Vogi, segir mikið framboð á kókaíni um þessar mundir.

„Þegar framboðið er mikið þá lækkar verðið, þá komast fleiri í þetta. Það eru sífellt yngri að nota þetta og fólk sem hefði aldrei notað þetta ef það væri ekki verið að bjóða þetta alls staðar. Fólk fer á klósettið á skemmtistað, þá er fólk þar með kókaín í lyklinum að bjóða hvert öðru,“ segir Víðir.

„Þegar verðið er að lækka þá geta krakkar með litlar tekjur allt í einu haft efni á að kaupa kókaín.“

Þá hefur styrkleiki efnanna einnig aukist töluvert að undanförnu. Víðir segir lítinn mun orðinn á neytanda og seljanda þegar kemur að kókaíni. „Þeir sem nota mikið kókaín eru flestir líka að selja kókaín. Þetta er eins og Tupperware, þú ert að nota þetta og selja þetta líka.“

Arnþór Jónsson, formaður SÁÁ, segir eftirspurn eftir innlögn á sjúkrahúsið Vog fara vaxandi á sama tíma og afköstin eru stöðug í rúmlega 2.200 innritunum á ári.

„Síðustu þrjú ár hefur vímuefnaneysla í æð vaxið mjög, fjölgað í hópi nýrra sprautuneytenda og fjölgað innlögnum alls hópsins sem er áberandi veikur,“ segir hann.

Arnþór kallar eftir samstarfi SÁÁ, heilbrigðis- og félagsmálayfirvalda og sveitarstjórna um gerð áætlunar um stækkun sjúkrahússins Vogs og fjölgun úrræða sem taka við fólki sem er að ljúka meðferð.

„Útrýma þarf húsnæðisvanda þessa sjúklingahóps með stórhuga aðgerðum og bæta þarf félagslega stöðu með markvissum þverfaglegum stuðningi eftir meðferð. Framtíðarfræðingarnir okkar á Alþingi Íslendinga þurfa að skoða hvernig koma má þessu unga fólki til virkni.“


Tengdar fréttir

Í gæslu­varð­hald og ein­angrun grunuð um kókaín­smygl

Landsréttur hefur staðfest úrskurð Héraðsdóms Reykjaness þess efnis að kona er grunuð er um að hafa flutt hingað til lands um 400 grömm af kókaíni og 0,49 grömm af amfetamíni sæti gæsluvarðhaldi til 24. september næstkomandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.