Leikari úr Wa­yne's World og Jac­kass látinn

Bandaríski skemmtikrafturinn Rip Taylor er látinn, 84 ára að aldri.

Taylor var þekktur sem Kóngur glitpappírsins (e. King of Confetti) og Grátandi grínistinn, með oft á tíðum litríka framkomu.

Margir muna eftir Taylor úr kvikmyndinni Wayne‘s World 2 frá árinu 1993 þar sem hann lék sjálfan sig. Aðstoðaði hann félagana Wayne og Garth að koma tónlistarhátíðinni Waynestock almennilega á koppinn með því að lofa því að koma sjálfur fram á hátíðinni sem sérstakur gestur. Þá birtist Taylor einnig í fyrstu þremur Jackass-myndunum.

Bandarískir fjölmiðlar greina frá andlátinu í kvöld, en útgefandi Taylor staðfesti að hann hafi andast í Los Angeles fyrr í dag.

Grínferill spannaði einhverja sex áratugi og kom hann fram í ótal sjónvarpsþáttum á áttunda, níunda og tíunda áratugnum.