Íslensku stelpurnar komnar í undanúrslitin á Ítalíu

Íslenska sautján ára landslið kvenna í handbolta er komið í undanúrslit á EM-b á Ítalíu eftir átta marka sigur á Kósóvó í dag.

Íslenska liðið vann leikinn 27-19 eftir að hafa verið 12-8 yfir í hálfleik.

Íslensku stelpurnar höfðu áður unnið Ísrael (24-19), Tyrkland (32-22) og Tékkland (26-24). Þær kláruðu því riðilinn með fullu húsi stiga og 25 mörkum í plús.

Jóhanna Margrét Sigurðardóttir var valin maður leiksins hjá Íslandi en hún skoraði átta mörk í leiknum. Jóhanna Margrét spilar með Kongsvinger IL í Noregi.

Hanna Karen Ólafsdóttir úr Fylki og Rakel Sara Elvarsdóttir úr KA/Þór skoruðu báðar fimm mörk í leiknum í dag.

Næsti leikur íslenska liðsins er á laugardaginn klukkan þrjú að íslenskum tíma en þá spila stelpurnar í undanúrslitum keppninnar

 

 

 

View this post on Instagram

Stelpurnar okkar í U17 gulltryggðu sér efsta sæti A riðils í dag á EM á Ítalíu þegar þær unnu 8 marka sigur á Kosovo 27-19. Staðan í hálfleik var 12-8 fyrir Íslandi.  Jóhanna Margrét Sigurðardóttir var valin maður leiksins hjá Íslandi en hún skoraði 8 mörk.  Næsti leikur liðsins er á laugardaginn kl. 15 að íslenskum tíma en þá spila stelpurnar í undanúrslitum.  #u17kv #stelpurnarokkar #handbolti

A post shared by Handknattleikssamband Íslands (@hsi_iceland) on Aug 8, 2019 at 7:18am PDT